Durante un reunion cu Minister Chris Romero, Director General di Union Postal Universal, sr. Bichard Hoessein, a aproba e peticion di pais Aruba pa bira un ‘Hub’ regional pa e area di Caribe. Sr. Hoessein a indica cu esaki ta un di e puntonan mas primordial di Instanbul Postal Strategy 2017-2020, y cu e ta sumamente contento cu e desaroyo aki den y pa e region Caribense.
Den e reunion entre UPU y Ministerio di Transporte, Comunicacion y Sector Primario di Aruba, tabata presente tambe sr. Pascal-Thierry Clivaz, kende ta ‘Deputy Director General’ di UPU, sr. Rudy Cuadra, cu ta ‘Director of Development and Cooperation’ di e International Bureau di UPU, sr. Theo Kock, Presidente di Hunta di Supervision di Post Aruba NV, sr. Luigi Bergen, kende ta liaison di Ministerio di Transporte, Comunicacion y Sector Primario encarga cu sector postal, como tambe Secretario General di ‘Caribbean Postal Union’, sr. Guillermo Raymond.
E hub aki lo nifica cu tur post di Caribe lo pasa via Aruba y for di nos pais esakinan lo wordo distribui pa e otro islanan den Caribe, y kizas tambe pa e paisnan di Latino America mas sercano.
Sr. Hoessein a gradici Minister Romer pa su intervencion na e Congreso 2018 di ‘Caribbean Postal Union’ na St. Lucia. Danki na Minister Romero su intervencion un pais Caribense mes a bira Secretario General di CPU, den persona di sr. Guillermo Raymond, kende na mes momento ta e Director actual di Post Auba NV. UPU lo asisti Aruba cu tur guiansa necesario pa e ‘hub’ bira un realidad.
Durante e reunion sr. Hoessein a duna instruccion pa su ekipo di trabou bin cu un mapa di conectividad entre e islanan Caribense. Tambe e ta desea un pa un “assessment” wordo haci di con post por drenta y sali di Merca, den caso cu e pais aki dicidi di retira su membrecia for di UPU, manera ta wordo premira y no tin e servicio di USPS mas.
E Director General di UPU ta kere firmemente cu mester sigui traha di serca cu douane di Aruba pa asina facilita e ‘flow’ di cantidad di pakete cu ta bai drenta y sali for di nos pais.
Minister Romero a gradici sr. Hoessein pa aproba e proyecto y a indica cu e Proyecto aki lo bira un prioridad den su maneho y cu lo ta na bienestar di e sector postal.
