Awe marduga un auto cu velocidad basta halto no a calcula e rotonde na Hato mucho bon y no a logra tuma e birada completo. E chauffeur, manehando un Nissan Cube for di direccion pariba (Tanki Flip) no a logra regula su velocidad y a baha caminda na man drechi, subi acera y topa frontal cu e palo di luz. Dor di e impacto tabatin daño tanto na e auto como na e palo di luz.
Polis den vecindario a topa cu e accidente, a tuma nota cu e chauffeur tabata mustra bou influencia di alcohol y a opta pa lage supla pa elimina cualkier duda. Mientras e nivel permiti di alcohol den bo rosea ta 220 ug/l, e chauffeur a midi no menos cu 900 ug/l cu ta surpasa e limite drasticamente.
Mesora Polis a deten’e y hibe Warda di Polis. Cu tipo di nivel di buracheria asina hopi biaha e chauffeur ta core e risico di perde su rijbewijs pa un tempo of pa semper!
