Ultimo tempo ta notando cu e cantidad di autonan cu ta bolter, a subi sorprendentemente. Awe tardi nos tabatin un auto cu a bolter na Sabanilla Abou na Santa Cruz. Durante e siman cu a pasa, tabatin varios otro incidentenan unda auto a bolter. Y awe nochi 8:00 pm un auto a bolter riba Avenida Nelson Orlando Oduber, antes conoci como Sasakiweg.
Testigonan a conta nos cu riba e caminda despues di House of Cheng, direccion Super Food, un auto marca Chevrolet, modelo Spark, color preto, numera A-15223, a baha caminda, ranca un pal’i luz y despues bay bolter memey di barancanan grandi cu tin cant’i caminda.
E prome unidad di polis cu a yega na e sitio a constata cu e chauffeur, un hende homber, tabata mal pega den e auto. Como cu e vehiculo a bolter, tabata masha dificil pa por a sac’e. Mesora a activa mas ambulance, cu paramediconan abordo y un unidad di rescate di Cuerpo di Bombero pa brinda asistencia cu urgencia. Pa evita stagnacion innecesario den trafico, polisnan a desvia e autonan for di leu caba, pa asina e vehiculonan di rescate pora a haya caminda liber pa yega e luga di accidente mas lihe posibel.
Polis ta sospecha cu e chauffeur di e auto cu a bolter posiblemente tabata bou di influencia di alcohol y mirando e accidente, cu velocidad halto tambe lo a hunga un rol grandi. Expertonan ta pensa cu e homber a perde control su so cu su so den auto y cu consecuencia cu ora a reacciona mucho abrupto, a perde control riba e stuurwiel cu consecuencia cu el a ranca un palo di luz y despues bay bolter.
E trabou di rescate na e sitio no a bay facil. Bomberonan a purba diferente formula con pa corta e auto pa yega na e pashent sin hacie daño, pero no a logra den e prome dos intentonan. Claro cu tempo ta sigui core y publico den banda ta bira inpaciente y ta cuminsa expresa critica pa e forma di traha di e ekipo di rescate, forma pa bombero y ambulance. Den un di tres intento, a uza ekipo mas pisa ainda pa corta henter e dak di auto, pa por a saca e victima for di ariba. Esey si a logra y di e forma ey a logra pone e homber riba un cama y hib’e den ambulance pa por a cuminsa atende cu ne riba e heridanan ricibi.
E caminda a keda basta rato cera pa e polisnan di e departamento di investigacion di accidentenan di trafico por a haci nan analisis, saca potret, midi caminda y evalua tur parti di e accidente, aunke no tabatin un di dos partido envolvi. E unico daño cometi tabata na e palo di luz. Probablemente e chauffeur mes lo mester cubri e daño haci na su propio vehiculo.
