Algo pasa di mey anochi pa manece dialuna, patruya di playa a wordo manda banda di Caribbean Overseas pa un accidente. Na yegada a bin topa cu un nNissan Skyline kibra riba caminda y e manehador para banda di e auto.
Mesora polis a bay chek kiko exactamente a sosode. A cuminsa investiga kiko por ta e causa di e accidente. E chauffeur a conta polis cu e tabata biniendo for di nort y diripente un auto a sali for di e crusada di Caribbean Overseas. E no por a haci nada y a perde control riba stuur di e auto y bay dal den e cashi coriente di Elmar pega cu Caribbean Overseas. Despues a bay para riba caminda.
Ora polis a bay investiga a nota cu e auto Skyline tabata biniendo cu velocidad hopi halto y pa e motibo ey a perde control y bay dal den e cashi coriente di Caribbean Overseas. E chauffeur a sali ileso for di e accidente. Asina mes ambulance a presenta pa asina paramediconan duna asistencia medico na e manehador di e Skyline. Daño material tabata hopi grandi y e auto no ta sirbi mas. Takel wagen a ser pidi pa asina kita e auto for di caminda. E chauffeur a scapa milagrosamente.