Temporada di fin di aña ta den ful swing y ya tur caminda por mira tur tipo di decoracion y luz pa asina trece e ambiente di Pasco den henter pueblo. Ta custumber caba cu ta dedica dia special na cendemento di luz na diferente rotonde, luga of bario.
Y asina tambe diasabra a cende e luznan di e kerstboom den e bario di San Nicolas. Segun e presidente di San Nicolas Business Association, Andres Hernandez a splica, e famoso kerstboom aki ya ta existi pa mas di diescinco aña. E tempo ey, tabata Valero a otorga esaki como regalo p’e asociacion.
A scoge e fecha particular di dia 11 di december debi cu aña pasa a perde un gran persona di e bario di San Nicolas, esta Eric Rudy Nassy. Segun Hernandez a splica, e ta un persona cu a haci hopi pa e bario di San Nicolas y ta p’esey a honr’e riba e anochi tan special aki.
Pa cobertura mas amplio lesa edicion di TREMPAN mañan.
