Cu hopi entusiasmo CEDE ARUBA a presenta su ‘compas strategico’, un plan amplio pa desaroyo di comunidad di Aruba. Den presencia di su Excelencia, Gobernador Interino Agustin Vrolijk, Minister di Husticia y Asunto Social, Rocco Tjon, e representantenan di directiva di CEDE ARUBA y un cantidad grandi di fundacion y instancia social den nos comunidad, a presenta e logo nobo y tambe duna un splicacion di e pilarnan strategico di CEDE ARUBA.
Na comienso di e evento a haci un recorido di e 42 añanan di trabou di CEDE ARUBA. El a duna sosten na e iniciativanan di trabou den nos comunidad. Un historia cu ta data for di 1980 ora cu Aruba tabata forma parti di Antias y den e constelacion ey a cuminsa cu CEDE ANTIAS. Na 1986 CEDE ARUBA a bira independiente a traha cu fondo di KABNA. For di aña 2000 CEDE ARUBA ta ricibi financiamento for di Fondo di Desaroyo di Aruba (FDA) y a cuminsa colabora cu Samenwerkende Fondsen Cariben.
Hunto a logra sostene un cantidad di programa y proyecto valioso cu te dia di awe ta den funcion. Na 2017, Gobierno di Aruba a firma un acuerdo di colaboracion a termino largo cu CEDE ARUBA y Samenwerkende Fondsen Cariben. Esaki a haci posibel cu CEDE ARUBA por a crece y yega na mas partnernan internacional. CEDE ARUBA ta e unico organisacion cu ta opera den un forma asina ariba e islanan de Reino, e unico CEDE cu a keda despues di CEDE ANTIAS.
Despues di parti historico aki, a presenta e logo nobo, cual ta un logo diferente y colorido cu ta e simbolo pa e diferente papelnan di CEDE ARUBA. E papelnan cu CEDE ARUBA tin ta duna y intermedia pa fondo, traha na mehora capacidad di organisacion, abogacia pa gruponan den minoria, traha na colaboracion entre iniciativa y yuda desaroya iniciativa nobo. E compas ta para central den e logo mirando cu CEDE ARUBA ta yuda busca direccion den nos desaroyo di comunidad.
E compas strategico ta basa ariba 4 pilar:
- Empodera e cuidadanonan
- Prevencion den comunidad y aumento di solidaridad
- Baha pobresa inter-generacional y sostene e gruponan vulnerabel
- Yuda e organisacion bira mas fuerte y alinea cu necesidad den comunidad.
Daniel Tecklenborg, Director di CEDE ARUBA a duna un splicacion di e trabou di CEDE ARUBA den cada pilar y e posibel sosten pa e organisacionnan.
Na e di dos parti di e evento tabata tin diferente workshop: uno ta di duna informacion tocante procedura y aplicacion pa fondo di Samenwerkende Fondsen Cariben. Tambe a duna splicacion tocante e programa di boluntarismo nobo www.arubavolunteers.org y por ultimo a duna un splicacion tocante e programanan di Erasmus Plus y European Solidarity Corps pa stimula trabou boluntario internacional di adultonan hoben. CEDE ARUBA ta wak bek ariba un bon atendi a pesar di e mal tempo cu tabata tin y ta gradici tor organisacion y iniciativa pa nan interes.
