E Indice di prijs di consumo (CPI) pa luna di juli 2021 ta 98.53, loke ta representa un subida di 0.5% compara cu e indice di juni 2021 (98.09) y acumulando un subida di 1.5% te cu na juli di e aña aki. E cambio di e CPI pa e ultimo diesdos (12) lunanan (juli 2020 te cu juli 2021) ta 1.8%, un subida di 5.0 punto di porcentahe (ppt) compara cu e periodo corespondiente di aña pasa (-3.2%).
E promedio anual di e indice di inflacion pa e periodo di juli 2020 te cu juli 2021 ta -1.4%, un caida di 2.8 ppt compara cu e 1.4% registra den e periodo di juli 2019 te cu juli 2020. Durante e luna aki, shete (7) di e diesdos (12) sectornan a registra subida di prijs. E subidanan cu tabata tin e mayor efecto riba e CPI a wordo registra pa e sectornan di ‘Vivienda’ (1.3%) y ‘Cuminda y bebida no-alcoholico’ (0.9%), causando un efecto di 0.34 y 0.09 ppt. E subidanan den e restante sectornan a contribui cu un efecto di 0.25 ppt riba e CPI di juli 2021.
E subidanan aki ta contraresta parcialmente door di caida den e indice di e sectornan di ‘Mobilario’ (-1.8%) y ‘Recreacion y cultura’ (-0.7%) cu a contribui cu un efecto di respectivamente -0.16 y -0.07 ppt riba e CPI di juli 2021.
E subida den e sector di ‘Vivienda’ a causa door di principalmente un subida di 5.9% den e categoria ‘Mantencion y reparacion di vivienda’, causando un efecto di 0.32 ppt. E subida den e sector di ‘Cuminda y bebida no-alcoholico’ a causa principalmente door di un subida di 1.0% den e categoria ‘Cuminda’, causando un efecto di 0.09 ppt. E caida den e sector di ‘Mobilario’ a causa principalmente door di un caida di 5.2% den e categoria ‘Aparato pa uzo domestico’, causando un efecto di -0.13 ppt. E caida den e sector di ‘Recreacion y cultura’ causa door di principalmente un caida di 2.3% den e categoria ‘Vacacion’, causando un efecto di -0.07 ppt.
Canasta di consumo
E canasta di consumo di e CPI ta consisti di 408 bienes y servicionan. Compara cu juni 2021, 49.0% di e bienes y servicionan aki a conoce un aumento di prijs causando un efecto di 1.15 ppt, mientras cu 35.3% ta mustra un caida di prijs, cu a contribui cu un efecto di -0.70 ppt y pa e restante 15.7% no tabata tin cambio den prijs. Prijsnan di bienes a subi cu 0.8% y a causa un efecto di 0.44 ppt. Prijsnan di servicionan a conoce un subida leve di 0.03% y a causa un efecto di 0.01 ppt riba CPI di juli 2021.
Core inflation
E CPIC (core inflation) – CPI excluyendo e efecto di energia y cuminda – a registra na juli 2021 un caida di 1.4%. E indice di energia – cu ta consisti di e productonan: electricidad, awa, gasolin y diesel a registra un caida di -0.9%. E indice di cuminda a registra un caida di 2.3%.
Bestaansminimum
E bestaansminimum pa un hogar consistiendo di dos (2) adulto y dos (2) mucha (edad 0-15 aña) na juli 2021 ta Afl. 4,815, un subida di Afl. 55 compara cu juli 2020 (Afl. 4.760). E bestaansminimum pa un hogar di un (1) adulto ta Afl. 2,293, un subida di Afl. 26 compara cu juli 2020 (Afl. 2.267).
Cambio di prijs di Cuminda y servicio di catering na juli 2021
E indice di ‘Cuminda & servicio di catering’ a registra un subida di 0.7% na juli 2021, despues di un subida leve di 0.03% na juni 2021. E indice di ‘Cuminda na cas’ (0.9%) a registra un subida, unda shete (7) di e diesun (11) indicenan di e gruponan di cuminda na cas a subi na juli 2021. E indice di ‘Pan y otro productonan di grano’ a conoce e subida di mas grandi (4.1%) na juli 2021. E indicenan di “Batata, yuca y batata dushi’ (2.6%), ‘Azeta y otro productonan traha di vet’ (1.9%), ‘Berdura’ (1.6%) y ‘Sucu, jam y otro tipo di cos dushi’ (0.5%) tambe a registra subida.
E indicenan di ‘Restante productonan pa alimentacion’ (-0.2%), ‘Fruta’ (-0.2%) y ‘Pisca y otro cuminda di lama’ (-0.2%) a registra e caidanan di mas grandi na juli 2021. Ademas, un caida di 0.1% a wordo registra den e indice di ‘Lechi, keshi y webo’.
Den e ultimo diesdos (12) lunanan e indice di ‘Cuminda & servicio di catering’ a subi cu 0.1%. E indice di ‘Cuminda na cas’ a conoce un caida di 0.3%. E indice di ‘Berdura’ a baha cu 8.6%, e caida di mas grandi entre e gruponan di cuminda na cas, mientras cu e indice di ‘Lechi, keshi y webo’ a subi cu 1.5%, e subida di mas grandi entre e gruponan di cuminda na cas.
E indice di ‘Cuminda pafo di cas’ a subi cu 0.2% na juli 2021 y a registra un subida di 1.2% den e ultimo diesdos (12) lunanan.
Na juli 2021, ‘Cuminda na cas’ y ‘Cuminda pafo di cas’ como grupo, tabata tin un subida di prijs di 0.7% compara cu juni 2021 y hunto tabata tin un influencia di 0.10 ppt riba e CPI, mientras cu e restante bienes y servicio hunto a experencia un subida di prijs di 0.4% y tabata tin un efecto di 0.35 ppt riba e CPI.
