Banco Central di Aruba (BCA) ta informa cu en conexion cu e introduccion di e serie di biyetenan di florin 2019, a drenta na vigor 1 mei 2019 un amienda den e Ordenansa pa preveni y combati labamento di placa y financiamento di terorismo (“Landsverordening voorkoming en bestrijding witwassen en terrorismefinanciering”) (AB 2011 no. 28).
E amienda aki ta otorga na BCA e autoridad pa, den su tarea como banco di circulacion (circulatiebank), raporta na departamento di “Meldpunt Ongebruikelijke Transacties” (MOT) cualkier transaccion of intento di transaccion cu BCA tin rason pa asumi di por ta relata na labamento di placa of financiamento di terorismo.
Pa cumpli cu articulo 55a, paragraf 3 di e Ordenansa pa preveni y combati labamento di placa y financiamento di terorismo BCA a establece normanan pa ehecuta na un forma adecuado y efectivo su autoridad pa raporta transaccionnan of intento di transaccion cu ta duna motibo pa asumi cu nan por ta relaciona cu labamento di placa of financiamento di terorismo na departamento di MOT. E normanan ta inclui den un documento di maneho y ta drenta na vigor 5 december 2019.
E documento di maneho menciona ariba ta obtenibel riba e website di BCA (www.cbaruba.org).
Pa obtene informacion adicional por tuma contacto cu departamento di Cash Operations & Logistics di BCA na telefon 525-2139 of 525-2141 of via email [email protected].
