No solamente nos beachnan, nos naturalesa y carnaval Aruba ta conoci pe. Tambe nos
fauna ta algo cu a sa di yama atencion. E biaha aki na un dierentuin na Staten Island New
York.
Nos cascabel ta unico na mundo y ta wordo considera como un especie na peliger y e
dierentuin a sa di bin cu un programa di cria cu tabata uno exitoso. Pa e motibo aki,
bishitantenan di e dierentuin, na honor di esaki, por pasa disfruta di un buffet tropical.
E cria di cascabel ta forma parti di Rattlemania, cual ta wordo organisa pa prome biaha door
di Staten Island Zoo. Esaki a wordo teni diasabra atardi na West Brighton, como un di nan
eventonan special nobo, unda cu e bishitante por tin un encuentro unico cu e mundialmente
famoso coleccion di reptil di e dierentuin.
E evento aki a ofrece na muchanan di cualkier edad, un oportunidad pa por mishi y alimenta
e tortuganan gigante di e dierentuin y observa aspectonan rara bes mira di e tareanan di
cuido di animal di e dierentuin. Durante e evento aki, bishitantenan por a mira crocodil, gila monsters y cobra na momento di nan alimentacion, mientras cu un cuidado ta duna su charlanan informativo. Miranto cu ta trata aki di Rattlemania, bishitantenan bao di 16 aña, tabata haya maracanan di cascabel por nada. Tambe muchanan tabata tin e oportunidad pa yuda e staff di e dierentuin pa midi e largura di un Boa Constrictor, sigurando un data preciso pa e team veterinario. E evento aki, incluyendo esun di e cascabelnan Arubiano, tabata pa recauda fondo pa asina mehora e exhibicion y otro desaroyonan pa e Reptile Wing.
