Dia 22 di februari 2012, durante un operacion pidi door di DEA di Merca, tiro a sali for di arma policial matando dos Colombiano cu tabata na punto di wordo aresta. E famia despues di esaki a dicidi di entama un caso pa daño y perhuicio, canando e caminda civil enbes di penal. E caso a cana su caminda y a yega te na Cassatie (Hulanda), unda cu Huesnan a dicidi cu e demanda haci door di casa y yiunan, pues e herederonan, no tin base.
E decision aki a bini despues cu den Corte di Prome Instancia nan a haya razon y a otorga nan un suma di daño y perhuicio cu pais Aruba mester paga. E prome caso tabatin decision den dianan 2 october 2013 (den un caso) y 18 di juni 2014 (den e otro caso), cu ta decisionnan di Corte di Prome Instancia. Despues Hof a trata e apelacion haci door di Pais Aruba y den cual tabatin decision riba 17 di november 2015 y 19 di april 2016. Den e veredictonan a rechasa e demanda di famia di e Colombianonan.
Corte di Casacion awor a rechasa peticion di e famia pa e mesun motibo cu Hof. Nan ta kere cu e famia mester a cana e caminda penal enbes di civil pa yega na un daño perhuicio, mirando cu den e caso aki e tabata un asunto penal, detencion di e dos personanan cu tabata wordo busca door di Husticia Mericano. Nan mester a entrega un keho penal den menos cu tres luna despues di e sucedido pa trata di logra condena di e funcionarionan policial y cu un decision di culpabilidad por a haci e demanda di daño y perhuicio.
Awo nan a perde e caso den Cassatie atrobe y a condena nan pa paga e gastonan di e procedura tambe. E posibilidadnan pa e famia a bira masha minimo si no ta nihil.
