Awe mainta den careda di 11:50AM bisiñanan atenteno na Maria Maai a tende un explosion. Nan a core bay pafo pa mira kico ta pasando y a mira un cas tabata saca huma. Aki tabata trata di adres Maria Maai 15, unda cu ta biba un homber di edad y kende no tabata na cas e momento ey.
Di biaha e bisiñanan a bati alarma. Polis a presenta na e sitio, mientras cu central di Brandweer a manda dos unidad. Na yegada di Brandweer, bomberonan cu tur precausion a cuminsa cu nan trabou y a paga e candela cu tabata den un camber. E cas a sufri hopi daño door di awa y huma.
Instancianan concerni tin di presenta pa investiga dicon e candela a cuminsa, pero tambe door cu e dak ta di asbest. Tambe a pidi asistencia di slachtoffer hulp pa papia cu e homber, kende ta biba su so. E cas a keda inhabitabel y p’esey no por bisa si e homber lo bay keda na un cas di famia of ki yudansa e lo ricibi for di instancia concerni.
