Cu awa na wowo sra Miriam van der Linden mester a para wak su cas kima por completo sin por haci nada. Un marduga di teror pa un famia na Savaneta despues di entrega keho di destruccion di su casita na cunucu. Awor ta su cas mes na Rooi Kochi a wordo cendi na candela.
Na luna di januari 2020 e señora Miriam van der Linden a entrega keho contra un hoben y su amigonan cu ta horta cabrito y ta scondenan na e famia su cunucu. A prohibi e hoben aki, cu un omo a cria, entrada na e cunucu. Aparentemente e hoben lo a baha su rabia y a comete destruccion na e casita na Cunucu cu ta keda patras di Tanki di Savaneta. Polis a bay y detene e sospechoso.
E hoben tin e señora cu su casa menasa, cual el a skirbi tambe riba muraya na e cunucu. Ayera nochi cu e famianan tabata pasando tempo na e cunucu, e cas di e señora Miriam van der Linden su so ta pega na candela. No tabata tin niun hende na cas pasobra famianan tabata pasando weekend na cunucu. E famia van der Linden mester a yega haya su cas completamente boy candela, cu dos unidad di Brandweer no por a controla mas y e cas a pega candela por completo.
Ta spera cu Husticia y investigacion forensico saca afo ta con e candela aki a cuminsa den marduga di diadomingo. Cu mientras e famia tabata ausente, pasando un weekend ameno, na cunucu, ta wordo confronta cu un tragedia di teror. E caso aki sigur lo bira interesante, pasobra unda cu tin keho entrega di menasa caba, a sigui awor cu cas a wordo cendi na candela. Ta desea e famia hopi forsa y cu pronto lo bin aclaracion y husticia.
