For di aña pasa Fundacion Anti Droga Aruba (FADA) a cuminsa prepara pa su campaña den temporada di carnaval cu ta hiba e nomber di Carousel 2020. Esaki FADA ta realisa den cooperacion cu diferente otro fundacion of instancianan.
Durante un conferencia di prensa Rulienne Arends, di FADA, a splica cu e campaña aki ta dirigi riba studiantenan di scolnan secundario, e prome y di dos aña. E scol mes lo dicidi na cual di e añanan e informacion ta wordo suministra.
Carousel ta un programa cu FADA ta pasa cun’e na scolnan secundario unda cu ta suministra informacion na e hobennan pa conscientisa nan riba e uzo di droga y alcohol. Ya caba for di aña pasa FADA a cuminsa tuma contacto cu scolnan pa mira cualnan ta interesa pa participa den e programa. E resultado, segun director di FADA sra. Arends, tabata hopi positivo pasobra mesora a cuminsa haya confirmacion y aworaki tin solamente dos fecha habri, di e 13 fechanan cu a programa.
No solamente FADA ta participa den carrousel di informacion pero tambe personal di CAA, DBZ, Telefon pa Hubentud, Wit Gele Kruis y inclusive Duana. Arthur Comenencia di Consultorio pa Asuntonan di Adiccion, a splica cu nan participacion den e programa Carrousel ta pa conscientisa e mucha y hobennan riba e adiccion di video-gaming, un problema cu a binta aumentando aki na Aruba. E ta importante e tema aki, el a bisa, pasobra hopi biaha ta laga hobennan nan so na cas, hungando weganan. Nan kier conscientisa e hobennan riba tur aspecto y e consecuencianan cu e adiccion aki tin riba nan comportacion.
Monique Thiel Labad di Wit Gele Kruis (WGK) ta toca un tema cu semper ta resalta bou di hobennan: embarazo hubenil. Den e charlanan lo enfoca kico tur ta nifica ora cu bo bira un mama hoben. Ta enfoca riba e bida dificil cu un mama hoben ta hiba. WGK ta contento cu e cifranan ta demostra cu e cantidad di embarazonan hubenol a baha ultimo aña y e ta sigur bou di 100 caso. Giovanni Nicolas di Duana a bisa cu nan ta bay mustra kico ta nan trabou, cu droga ta malo pa bida y salud di un hoben.
Departamento di Salud Publico y Telefon pa Hubentud lo bay riba kico ta mayoria di preocupacion di e hobennan y e peligronan pa keda contagia cu cierto tipo di malesanan den e temporada di carnaval.
Programa
Ya pa varios aña caba, Fundacion Anti Droga Arubano (FADA) ta bin cu e famoso “Carousel” cual ta conforma pa un team di profesionalnan trahando den diferente fundacion y cu ta uni pa asina trece informacion relevante y pa conscientisa e hobennan durante e temporada di carnaval. Nan ta acerca diferente scolnan secundario pa asina nan haya informacion di cada un instancia pa locual ta trata e temporada di carnaval. Sra. Rulienne Arends, Trahado Preventivo di FADA, ta amplia mas ariba esaki.
Cada un instancia lo papia ariba nan topico y esaki ta link e hopi na Carnaval.
Pa loke ta trata FADA, e focus principal lo ta alcohol, cual ta e droga cu ta bin mas dilanti durante e temporada aki. No solamente bou di hoben, pero tambe bou di adultonan. Pa esaki a scoge un biaha mas pa haci e presentacion di alcohol. Sin lubida e parti di droga cu ta bin dilanti, pero e parti di droga otro fundacionnan lo elabora ariba e tema aki.
