Studiantenan di Julianaschool den 4de klas ta den un incertidumbre, mirando cu tin algun cambio cu Examenbureau a bin cu ne na ultimo ora, cual segun e studiantenan ta perhudica nan.
DJ Fluonia, un alumno den 4de klas di dicho scol, den nomber di e alumnonan di MAVO cu lo bay pasa examen final cu lo tuma luga entrante otro siman.
Segun e hoben, nan ta den un situacion inhusto cu Examenbureau a dicidi na ultimo momento pa opta pa hinca materianan cu nan mes a bisa pa laga afo pa SE1, 2 y 3. Awo nan kier hinc’e den un lapso hopi cortico y esey no ta husto.
Segun Mishalska Maduro, un otro alumno den examenklas, a menciona cu 9’or di dialuna anochi nan a haya sa di esaki. Diaranson, ta 1 lesuur so nan tin cual ta 45 minuut. Nan docente a comenta na nan cu ta dura un siman minimo pa splica.
E studiantenan mester splicacion, mester train y mester siña pa examen. Si nan haya un pida so den un lesuur, nan no por train, no por traha examen. Nan ta bay tin hopi mas stress. Si nan haya 45 minuut, cual ta practicamente nada di e materia, nan no lo por haci e examen bon.
Fluonia ta comenta cu esaki ta perhudica nan pasobra ta pone hopi mas stress riba nan di loke nan tin caba. Economie no ta e unico vak. Nan tin seis vak y algun tin shete hasta y ta traha hopi riba e studiantenan, pa algo na ultimo ora asina, cu nan no por practica p’e y esey lo ta un resultado riba nan cifra.
Maduro a comenta cu nan ta 60 mucha na Julianaschool cu tin Economie. Pero tur scol di MAVO na Aruba ta haya Economie. Ta hopi studiante, e hoben a indica y no ta tur di nan a haya e vak. Tur loke e studiantenan kier, ta pa Examenbureau kita e tres materianan cu nan a pone dialuna anochi.
