Camara di Comercio (KvK) a reacciona un rato pasa riba e decision di Minister di Economia y Departamento di Asuntonan Economico pa orario di negoshinan e fin di siman di Pasco Grandi. Gobierno kier impone un orario den cual comercio mester respeta e dianan liber. Nan tin di cera riba diabierna, diadomingo y dialuna cu excepcion di algun casino, facilidadnan cu ta den hotel. E anuncio abrupto aki no a cay den bon tera cerca comerciantenan.
Omar Tromp, presidente di Camara di Comercio, a splica cu e directiva tin di vocifera riba e cambio di beleid di ceramento p’e dianan venidero. Na comienso di siman e mandatario a anuncia cu lo duna ontheffing, cual tur aña ta duna, na e landsverordening di orario di cierre di negoshinan. Esey tabata pone cu tur negoshi ta habri normal te 9:00 pm riba Diabierna Santo, diadomingo y dialuna.
Camara di Comercia a mira e comunicado reahusta unda ta bisa cu asina mes ta cera Diabierna Santo, diadomingo y dialuna. Nan ta lamenta esaki pasobra prome ta anuncie di ta habri y awe net un dia prome ta anuncia di cambia beleid. Esey ta adhoc, hopi riba man p’e negoshi cu a plania caba pa habri den e dianan di fiesta. Hopi hende a plania caba, tanto doño di trabou como empleado., nan schedule di fin di siman, pero no por lubida e consumido.
Awo ta haci esaki y awe tardi por spera un rush pa supermercado. Diasabra por spera mesun cos sabiendo cu diadomingo y dialuna ta mescos, pa no keda sin cumpra cos pa fin di siman. Tromp a expresa cu pa hopi hende esaki ta un weekend di celebracion pa diferente motibo. E por ta religioso, e por ta pa motibo di vakantie di scol, momento cu famia ta bini cerca otro den e crisis aki. Tur esaki ta stroba un tiki door di ceramento di negoshinan den dianan venidero.
