Camara di Comercio a tene un rueda di prensa unda cu a trata varios tema, entre otro e kiebro cu a tuma luga recientemente.
Segun vice presidente di e entidad, Kawish Misier, esaki ta e di dos biaha den un termino cortico cu tin un inbraak.
No sa exactamente ken e ta, pero si tin e imagennan di camara di siguridad, unda cu por a wak e cara, tin cierto DNA di e persona, kende ta e mesun cu a haci’e e prome biah.
Nan a kibra e glas di e porta dilanti, mesun porta cu e prome biaha.
Basicamente e persona a drenta, cana rond y despues a horta un caha cu tabata bashi.
Dos biaha el a horta y dos biaha e no tabata exitoso den su intencion. Pero ta lamentabel pasobra tin miles di florin den gasto pa un situacion cu realmente ningun hende a bay dilanti na dje.
Ta lamenta esaki hopi cu tin criminalidad. Awo tin di compronde di recherche cu e mesun persona aki a haci varios atraco caba den e vecindario aki y categoricamente ta desmenti cu tin un enemigo, cual a wordo insinua den prensa.
Esey no ta e caso. Camara di Comercio ta bon cu tur su cliente, stakeholdernan. Tur cos ta bayendo bon.
E prome biaha cu e incidente aki a pasa, tabata algo full nobo, pasobra e no ta frecuente.
Awo cu el a pasa e di dos biaha, ta wak cu tin un ripiticion y lo prepara pa e di tres biaha cu e bin, pa e no ta exitoso den su accionnan.
E antisocial a drenta Camara di Comercio, y kier a horta placa. Pero nan no tin placa warda den e caha anochi. Awo tin cu comunica mas claramente cu no tin placa y tin cu preveni cu nan por kibra e glas y drenta.
E hecho aki a tuma luga un luna pasa y e otro incidente a tuma luga diaranson manece diahuebs.
E antisocial a bay cu e caha di colecta. E tabata visibel for di pafo. Pero e no tabata tin hopi placa aden. E cennan cu tabata tin aden, tabata suficiente hopi pa el a kibra e glas y drenta hort’e.
