Diamars anochi a drenta informacion cu banda di un restaurant na Piedra Plat tin un auto sospechoso cual den dje lo tin un persona busca pa husticia, relaciona cu menasa cu arma di candela.
Unidadnan a cuminsa prepara y for di diferente angulo, unidadnan a cuminsa core riba caminda di Piedra Plata pa Paradera, pa mira si por topa cu e auto.
Ta trata di un Tercel color shinishi cu hood preto. A topa cun’e bayendo abao, yegando rotonde di Piedra Plat, banda di Bright Bakery. A pidi pa bay cu cautela cu e hendenan aki. Na momento cu a logra para e auto, a baha tur hende, cualnan ta dos persona y pone nan para keto.
Nan tabata buscando un sospechoso di inicialnan LM. Segun esnan den auto, ningun di nan dos tin e nomber ey.
Recherche tambe a cay aden y nan a dicidi e ora di pone tur para keto, mientras cu Recherche tabata na caminda.
Dado momento a opta pa bay cu un di nan warda pa bay verifica si ta e persona cu nan ta buscando. E auto tambe a keda confisca pa bay haci investigacion riba dje.
Unidadnan a reacciona rapidamente na momento cu tabata buscando tambe e auto y pa nan siguridad, varios unidad a presenta. No ta conoci si LM mes a keda deteni den e proceso.
A keda di bay haci full un investigacion riba e auto na warda, pa wak si tin cualkier evidencia cu tin di haber cu arma di candela, etc.
