Desde dia 6 di october habitantenan rond di e dam na Moko a haci un denuncia di e holo malo cu ta saliendo afo y pa colmo a haci un di nan malo.
Desde dia di e melding, Bureau City Inspector ta haciendo nan trabao di investiga y traha cu varios otro departamento di gobierno pa asina yuda soluciona e problema cu tin aki, pero ainda nan no ta cla.
mirando e avalancha di yamada cu e departamento ta hayando for di e habitantenan cu ta biba cerca, a dicidi pa yama e rueda di prensa pa trece dilanti kico ta tumando luga.
Director di e departamento Kevin Peterson, a splica cu riba e mesun dia di melding, Bureau City Inspector a manda tres inspector n’e sitio cu a constata cu e holo tabata uno bastante desagradabel. Di biaha a cuminsa envolve e departamentonan concerni pa mira kico por t’e problema cu e holo aki ta sali.
Bureau City Inspector no tin un laboratorio cu por haci e tipo di testnan asina. Ta p’esey mes a tuma contacto cu DVG cu si tin un laboratorio pa haci e testnan aki pa mira dicon e holo ta sali y tambe kico nan por haci pa por tira un kimico den e awa, cual, segun entendi, ta haciendo esaki tambe den e planta di purifica awa cerca dje hotelnan, cu tabata saca holo stinki.
DOW hunto cu DVG a logra soluciona e problema aki, cual a resulta. Segun Peterson, nan lo por haci algo mescos den e asunto aki tambe. Pero tur cos ta den man di DOW, DVG y DNM (Dienst Natuur & Milieu).
Ta trata aki di un tereno priva cu ta mas bien un ‘afgraving’ cu pa hopi aña a tuma luga y a yega t’e na nivel di lama.
E awa cu ta sali afo ta awa brak (salo) cu no por uza pa muha mata.
Ta conoci cu tin varios truck cu ta chica pos ta bin basha awa sushi den e dam. Fuera di esey tin hopi sushi cu ta deposita eynan, cu naturalmente ta causa molester. Segun Peterson, mirando cu e ta un tereno priva, e doño ta responsabel p’e.
Pa cobertura mas amplio lesa edicion di TREMPAN mañan.
