Diahuebs 9 di November Buleria ta cla pa participa den loke ta e Aruba Caiso & Soca Monarch 2024, den boca di pueblo miho conoci como Calypso & Roadmarch contest. Buleria lo ta banda number cuater, y nan ta subi stage cu cinco participante; Jair”Buddylove” Vesprey, Oyemaiky, EK, Rocco, tambe Chayo. E invitacion ta bay na pueblo di Aruba pa t’ey hunto cu e gang diahuebs anochi na The Venue. Por sigui e Live via Facebook di Stichting Musica tambe.
PREPARACION
“E preparacion a bay master,” segun Jair “BuddyLove” Vesprey. Buleria a cuminsa for di fin di luna di october caba, trahando riba e piesanan un pa un. E aña aki tin dos categoria den e festival: E groovey, cual ta e soca un poco mas rustig y bailabel, anto tin e power soca cu ta poco mas lihe y contagioso pa baila y move tiki mas dushi na e ritmo. E aña aki Buleria a cuminsa trempan, Buddylove a purba haci algo diferente tambe pa medio di skirbi su propio letranan cu ayudo di su tata Easy B, Galloway Jr y tambe Ataniro. E areglo a keda den man di productor Rygel Isabella cu ja caba for di tempo Buddylove a drenta Buleria seis aña atras, Rygel tabata t’ey stabil. E team no a cambia, a keda mesun cos.
Rygel a yuda Buddylove cu su groovey y su power soca, Oyemaiky tambe pa su groovey y power soca, manera tambe EK mescos. “E aña aki mi ta kere lo ta un exito mas grandi, nos ta hopi bon prepara y Buleria ta bay ta sende sende mes den e competencia,” Rygel Isabella ta expresa.
PIESANAN
Buddylove lo trece dos piesa, e groovey cu yama Can’t Take It, hunto cu e power soca cu yama Early Morning. E tema Can’t Take It ta un Groovey cu tin Buddylove ful su curason domina, ta algo completamente nobo, dushi, cu un ritmo cu bo lo scucha e guitara patras cual lo hiba bo leu. “Ora bo bay riba Cayanan di Aruba, bo lo bay recorda mi,” segun Buddylove ta comenta. E letranan ta algo bunita, un feel good soca, pa recorda tur hende cu cada un di nos ta unico cu nos propio Zjeito cual ta haci nos autentico. “E bunita ta cu nos ta busc’e, nos ta haya e proposito ey anto nos tin cu bras’e. Cu bo ayudo nos lo haci’e grandi. Un parti masha chikito mes cu mi lo kier pa abo canta hunto cu mi ta bisa ‘ulele’ y mi kier bo cant’e pa mi ora e momento yega.”
E power soca yama Early Morning y ta algo cu nos ta custumbra cu ne e anochi prome cu Jouvert Morning unda tur hende ta riba caya den preparacion for di trempan diabierna. Basicamente esey ta e idea tras di e piesa, locual ta pasa prome, durante y despues di parada di Jouvert. Buddylove: “Anto locual cu ta mas importante ta cu bo no tin cu worry kico mi ta haci, mind yo’ business!”
