Diabierna anochi, un dama yegando su cas na Cunucu Abou, a bay pa lora pa drenta su cura di cas, ora cu na dado momento, un brommer sin luz, a baypasa e auto na man robes, consecuentemente dal den e Mitsubishi Lancer y finalmente dal den e cura di cas.
Banda di 9’or y 5 di anochi, ora cu polis a yega, nan a bin topa cu personal di ambulance na e sitio ta atende e chauffeur di e brommer. Polis mientras tanto a bay atende cu chauffeur di e auto, e dama, kende a duna polis su version. El a relata cu na momento cu el a ay lora pa drenta su cura di cas, el a mira diripente e brommer na su man robes sin luz pasando e auto. E impacto tabata inevitabel. E chauffeur di e brommer a bay basta halto. Parce cu e chauffeur a presta e brommer for di un amigo di dje y pa su mala suerte el a haye den e accidente. Despues di a atende e hoben, ambulance a transport’e pa hospital. Tanto e auto, brommer y e cura tabata tin daño considerabel riba nan. Polis a tuma dato di e accidente.
