“Despues di e anuncio di e dos ministernan Oduber cu lo bin un Mega-Hotel na Baby Beach, nos por a mira un discusion carga di un faboritismo ciego di fanaticonan partidario pa defende un proyecto, cu supuestanente lo mester ta e solucion pa San Nicolas”, asina Booshi Weber di Partido UPP a duna di conoce. A zwaai cu rapport di un compania (amigo) cu a minimalisa e impacto social y ambiental y di e forma ey consolida e plan di gobierno.
Na mesun momento a prefera di sea ignora rapportnan cu a wordo ehecuta den pasado cu ta menos positivo of sea ta cuestiona rapportnan manera esun di Banco Central cu tambe ta devastador pa e plan di construi un hotel na Colony. Esaki no ta nada menos cu manipulacion den optima forma.
Dos minister (the O’z) den un conferencia di prensa a splica pakico nan ta kere den e proyecto aki, pero parce cu ta e minister encarga cu tereno, t’esun cu ta defende e proyecto aki mas. Por algo sera y p’esey no ta nada raro cu no kier menciona nomber di e “inversionistanan” (=sponsor?)! Di otro banda nos por mira con fanaticonan ciego di e minister encarga cu turisimo, energicamente ta defendiendo e proyecto aki.
Tin di nan ta hasta lubida, cu algun aña atras nan tabata masha preocupa cu nos medio ambiente y tabata contra di cualkier proyecto hotelero cu e ex-minister den e gobierno AVPOR di Turismo pa 7 aña y mei tabata purba bin cu ne y esaki segun e otro Oduber hunto cu su coleganan djis pa complace cu sponsornan. Integrantenan di e partido MEP y e tempo ey den oposicion como miembro di Parlamento tabata hasta preocupa pa e cachonan morto na santana di cacho. Awe e animalnan bibo parce di no ta conta y ta yama nan djis algun lagadishi, coneu, shoco y yuwana.
UPP den su prome programa di partido na 2013 a mustra di ta skeptico pa construccion di mas hotelnan grandi y tabata opta, manera cu Sam Cole a bin ta propone, pa bini cu hotelnan Boutique rond di 50 camber, y cu ta den man di nos mesun hendenan local. Den nos programa di 2017 nos a bay un tiki mas leu.
Nos a expresa nos preocupacion, hasta ainda pa construccion di mas hotel mes, incluso chikito, mirando na prome instante e capacidad di carga di nos pais den tur sentido di palabra y tambe pa e cambio cu tin den mundo di turismo, unda cu hopi turista tabata scohe pa otro tipo di accomodacion cu no ta hotel y nos problema social cu importacion di hendenan di exterior cu sueldonan minimo cu na su turno ta ocasiona problemanan social.
Apesar cu tur tempo, desde entrada di nos Status Aparte, contrario na rapportnan cu a propone pa duplifica e cantidad di cambernan di hotel, e prome gobierno di Aruba di signatura berde a scohe pa cuadruplifica esakinan (anto cu yen di proyectonan dudoso), a wordo papia di regula planificacion di nos turismo, concentrando riba calidad di e producto turistico. Pesey a bin tambe e eleminacion di e “tax-holiday” y a wordo papia di moratario pa cu hotelnan. Tanto na 2010 y na 2018 tabata tin mocionnan cu a wordo pasa, pero cu gobiernonan obviamente no a ni ta respeta Parlamento.
Den periodo 2002 te cu 2009 a atende cu e aspecto di capacidad di carga pa loke ta concerni nos turismo. Recomendacionnan tambe a sali, pero no a tene cuenta cu esakinan. Basicamente a recomenda pa concentra pa fortalece e producto turistico y ofrece e turista, banda di solo, lama, trankilidad, otro tipo di atraccion, diversificando asina nos turismo. Pero, tristo ta cu te ainda parce cu no kier comprende cu nos capacidad di carga a surpasa tur nivel.
Loke ta wordo demostra ta falta di vision di gobierno pa bin cu otro desaroyonan y ta recuri na formula anticua di djis bin cu un Mega-Hotel di 900 camber, keriendo cu esaki ta e solucion. Na 2016 e economista Arjen Alberts, a constata cu apesar di tur e plannan pa regula turismo na Aruba, nunca a tene cuenta cu e cantidad di hotelnan y turistanan na Aruba. Door cu turismo tabata asina exitoso, Aruba tabata crece y yena cu mas hende (turista y trahado), loke ta haci na su turno Aruba menos atractivo, druk, congestiona y caotico. Esey ta trece bek menos placa den caha, como consecuencia cu nos prosperidad ta baha.
E ta sigui mustra cu na 1986 Aruba a haci fout di tira completamente riba turismo como e fuente mas grandi di entrada. Loke no a sosode ta regulacion di tipo di inversion aki, mescos tambe cu e inmigracion. Pues segun su investigacion cu e nivel di prosperidad na Aruba, pa 25 aña a keda mescos. Y esaki ta masha simpel, esta dor di mas hotel, tabata bin mas placa aden, pero pareu cu ne e inmigracion a crece y defacto segun promedio ningun hende a bay dilanti. (Algo parecido tambe Banco Central a constata y awor parce cu the O’z kier cuestiona Banco Central seriamente.)
Alberts ta constata cu e “termino corto” a gana di e “termino largo”. E politico, e gobernante, tabata pensa riba haci su mes popular awo, dor di crea un hotel awo, pasobra awo nos mester crea trabou, pues ta pensa riba e “next election” enbes di riba e “next-generation”!!! No a studia kico e hende mes tabata kier. Esta sali for di “eybou” y bay pa un mihor trabou y cu mihor salario. Pero pa “eybou” tambe bo mester hende y hopi biaha den volumen grandi, hibando asina pa inmigracion masal, consecuentemente importando mas pobresa, cu hopi biaha ta nifica aumento di criminalidad.
Pero tur advertencianan parce di ta invano. Parce cu e gran mayoria ta wordo hiba pa fanatismo, lubidando cu turismo ta nos unico pilar economico aworaki y e stagnacion y e presion riba nos capacidad di carga ta loke al final lo bay costa nos saco y cangreu. Na momento cu e turista no ta haya e servicio y producto di calidad mas, e ta bira lomba pa Aruba. Nos lo no por garantisa trankilidad, servicio di calidad y loke nos ta ofrece e turista ta un Aruba yena cu beton, druk y sobrepobla.
Contrario na loke partidonan a ofrece durante e ultimo eleccion, nos ta ripara cu ta scohe pa e formula bieu y peligroso, di sigui cu construccion di mas hotel, treciendo mas hende di afo pa bin traha aki cu sueldo minimo (pa colmo no ta paga loonbelasting tampoco ) y cu na su turno lo nifica un peso mas pa loke ta finanzas publico di pais Aruba, medio ambiente, AZV, schoolnan, vivienda, careteranan etc.etc!!!
Ki dia nos ta compronde cu “ENOUGH =ENOUGH y “VOL = VOL????
