Awe durante e evento di apertura, diputado Hennyson Thielman a anuncia oficialmente cu BusinesSpark a habri su portanan. BusinesSpark ta e prome Business Incubator di Boneiro, situa den Playa, riba Kaya Gilberto Croes 1 net dilanti di Nature Discount. Durante e evento di apertura, invitadonan a haya un bista paden dicon e edificio a keda despues di e renobacion cu a tuma luga. A renoba e edificio di BusinesSpark den corto tempo door di e propietario. E edificio a keda transforma pa un oficina moderno y inspirativo den tempo record.
Den luna di april ultimo a anuncia BusinesSpark y mesora a habri oportunidad di aplicacion. Durante e periodo diferente empresario a aplica, di cual 6 empresario a logra pasa e seleccion final. Ainda tin mas aplicacion drentando y por spera pronto mas sparkers (empresario) haciendo uzo di e facilidad.
“Nos ta sumamente contento cu e apertura di BusinesSpark. Esaki ta un vision cu a fiha fo’i cuminsamento den nos plan di gobernacion y cu a cristalisa cu exito. Boneiro por ta contento di tin su prome business incubator. E idea ta pa crea mas di e facilidadnan aki pa empresario tin mas acceso na espacio cu ta chispa nan creatividad. Gobierno di Boneiro ta haci esaki pa facilita e empresario local pa nan por tin un negoshi exitoso”, asina diputado di desaroyo economico, Hennyson Thielman, a duna di conoce.
BusinesSpark ta un sitio financia pa Gobierno di Boneiro unda empresarionan por haya espacio pa oficina cu internet y otro facilidadnan. BusinesSpark ta e sitio ideal di trabou y encuentro pa empresario por siña di y inspira otro. E ta un sitio tambe pa, bou di guia profesional, crea, maneha of sigui desaroya un empresa exitoso.
Pa mas informacion tocante BusinesSpark por tuma kontakto via email na [email protected].
