Un situacion di basta tension tabatin na Cura Cabay. Un pareha den problema na dado momento a pone cu polis a presenta. Tur cos ta indica cu e pareha tabata de remate. Grito y desordo a pone bisiñanan bati alarma.
Prome unidad cu a yega a pidi presencia di mas colega na e sitio. A presenta mesora cu e transporte policial. Polis a subi bay na e piso unda e problema tabata na e casnan social na Cura Cabay Zuid.
Ey a topa cu un porta cera y dificilmente nan por a drenta. Dado momento a pidi presencia di bombero pa yuda kibra e porta. Claramente por a constata cu e cosnan den e cas tabata tur reboltia. Parce ambos tabata bebi y den pelea cu otro. Finalmente bomberonan a logra kibra e porta pa polis drenta.
A drenta y a detene e muhe cu tabata bou influencia y agresivo den e cas. Polis a baha cu ne for di e piso y hib’e den transporte policial mesora. Djey a bay cu ne for di transporte directo den e cel na warda di polis di San Nicolas. Den cel e sub-fiscal a bay mir’e y mustr’e cu e lo keda sosega pa algun ora te ora cu e baha for di e nubia cu e tabata aden.
E homber a keda su so den e cas y probablemente mester a cuminsa acomoda y drecha tur cos cu a reboltia den e cas despues di e confrontacion cu e muhe rebelde bou influencia.
