Brandweer ta basta druk. For di prome cu scol a habri brandweer a manda carta na diferente scol, haciendo un peticion pa nan por bin na e scolnan y duna charla. Segun vocero di Brandweer, Ferdinand Ponson, a splica cu tur a contesta masha lihe mes. Durante henter aña ta bezig ta haci lezing na diferente scol. En particular den Augustus y September, ta enfoca riba e parti di prevencion na e scolnan y ta duna e muchanan lezing. Ya caba nan a bishita 4 scol e temporada aki, pa mustranan kico ta plan di evacuacion. Pakico e plan aki ta importante na scol. Asina e muchanan ta hib’e cas, pasobra ta importante pa na cas tin un plan di escape pa si algo yega di pasa, pa sa con mester sali for di cas y unda por topa cu otro pa no bin un confusion. Ta bon pa meet un solo caminda pa asina preveni cu cosnan pio por pasa den caso di un incidente na cas y/of na scol. A bishita tamb scol Sta Famia na Pos Chikito.
Evacuacion den caso di candela
Esaki ta trata caso di candela. E por wordo uza tambe den caso di un temblor. Si algo mester pasa den e caso aki, of tambe marea mester subi, nan por haci esaki tambe pa logra tin e muchanan caba entrena for di scol, con pa bin cu un plan di evacuacion y pone den practica na cas, pa nan ta mas preventief bezig tambe.
Partinan basico
Ponson ta sigui splica cu ta papia riba hopi cos, manera 911. Ki informacion ta duna 911, ki brandweer ta haci, kico ta e trabao brandweer ta haci. Hende ta pensa cu brandweer ta traha solamente oranan di candela. Pero e trabao di brandweer ta hopi mas amplio cu esey. Por ehempel si un mata cay, ta forma peliger riba caminda of riba un cas di hende. Ta siña e muchanan pasobra e cultura na Aruba ta pensa cu ta candela so. E ora ta bezig ta cuminsa cu e educacion na scol, mustrando cu brandweer ta haci mas cu esey. Nan ta haci control di e sistema di alarma na hotel y demas edificio, etc. Ta bay riba e parti di evacuacion. Ta stress hopi riba esey pasobra no ta un cultura na Aruba pa tin un sistema di evacuacion na scol, na cas. Si bo bay den e paisnan den exterior, ta zona un alarma di candela y tur hende ta sali y nan sa kico pa haci. Akinan no ta asina. E cultura mester bin cu si tene un alarma di candela, mester por reacciona y cuminsa haci algo pa cuminsa evacua, vooral na scol cu tin hopi mucha cu mester saca nan mas lihe posibel for di den e localnan.
911
Hopi di e muchanan conoce e number. Nan tur ta reacciona riba dje. Si nan ta kere cu ta pa ora di candela so. Nan no tabata sa mas. Nan ta bezig ta siña cu e ta pa mas cu candela so. E ta pa accidente por ehempel. No ta djis yama bisa cu ta candela y cera. Ta yama bisa, kico tin, e nomber, adres y keda un rato na liña pa por despacha un truck of ambulance y despues sigui cu e trabao di puntra mas pa por yega mas lihe na e adres.
Participacion
Ponson ta splica cu ta bezig ta informa nan, cu cada rato cu nan haci pregunta cu por contesta, ta haya algo for di e presentador pa e ora eynan nan por wordo concientisa como un estimulo, cu e number ta bon pa corda. Corda informacion aki. Por ehempel si tin huma den un local, kico tin cu haci. Y tambe comparti cu famianan na cas y cu amigonan riba caya.
