Dialuna marduga a sosode algo cu a pone Polis actua contra un mama. E motibo ta cu el a permiti e yiu maneha un auto sin rijbewijs y sin cu e papelnan ta na ordo. Y riba dje no a sigui ordo di Polis.
Tabata den careda di 1:40 cu patruya a yega na un cas den Caya Totomo, na un compleho residencial na Sero Patrishi. Esaki tabata pa hala atencion di e mayor aki, cu ta parce ta consenti pa su yiu haci cos malo, si mira loke el a haci of con el a actua.
A resulta cu den oranan di anochi un patruya a para un vehiculo. A resulta cu e chauffeur ta un mucha homber menor di edad. Pues e no por tin rijbewijs. Esaki a sosode banda di Cas Casuela na Tanki Leendert.
Nan a kita e yabi for di dje y a lag’e cana bay cas na pia cu e mensahe pa avisa su mayornan pa presenta na Warda di Polis pa busca e yabi. Como cu el a tarda, durante patruya a dicidi di tira un bista banda di Cas Casuela y a constata cu e vehiculo no tabata na e sitio mas.
Despues di averiguacion a bin saca afo cu e mama a dicidi pa bay cu e yabi di spare y coy e auto na Tanki Leendert pa hib’e cas. Y no a cumpli cu e ordo di Polis pa presenta na warda p’e haya e yabi.
E polisnan cu a bay na e adres a papia cu e mama y a hala su atencion. Tambe a dun’e un boet pa laga su yiu menor di edad core auto (sin rijbewijs) y tambe a haya otro boet pa motibo cu e auto su documentonan no ta na ordo.
