Si! Nos curpa tin mester di salo. E salo ta wordo uza pa stimula nos nervionan, contrae nos musculonan y tambe pa absorba y extrae likido di nos curpa. Pa haci tur esey, e curpa tin mester di mas o menos 1 pa 3 gram di salo.
E Hartstichting di Hulanda ta recomenda pa come maximo 6 gram di salo pa dia. Asina mes hasta e cantidad ey ta wordo surpasa. Cifranan di Hulanda ta indica cu’n promedio di 8,5 gram pa dia ta wordo uza.
Pa Aruba tampoco ta un secreto cu nos ta consumi demasiado salo. E miho manera pa tin un bon maneho di salo ta ora nos mes ta haci nos propio cuminda. Nos tin un miho bista e ora riba cuanto salo nos ta pone den e cuminda. Tambe mester corda cu salo ta salo, no ta importa mucho si ta e salo di Himalaya of salo di lama of salo Celta. Den tur sorto tin mas o menos e mesun cantidad di natrium, un componente importante di salo. Dicon ta importante pa no uza dimas salo? Pa evita di haya presion di sanger halto of riesgo halto riba un malesa cardiovascular. Tambe paso e uzo dimas di salo por causa daño na e riñonnan.
Algun tips cu AZV por duna pa baha man na salo ta:
- Scoge pa productonan fresco.
- Duna bo cuminda sabor pa medio di uzo di specerij fresco y yerbanan natural.
- Lesa e etiketa riba e paki di cuminda pa haya sa cuanto salo (natrium) tin aden. Esaki ta yuda pa monitoria cuanto salo bo ta tuma.
Si bo haci uzo di cumindanan di bleki, por ehempel boonchi di bleki, percura pa ‘drain’ e likido ful. Tambe laba e boonchinan un par di biaha prome cu bay uza esakinan. Haciendo esaki bo ta saca e exceso di salo for di e boonchinan. Igual bo por haci cu otro tipo di berdura di bleki. Corda cu esaki ta solamente ora bo echt no tin otro opcion, fresco semper ta keda e opcion di mas saludabel.
