Awe Su Mahestad, Rey Willem-Alexander Claus George Ferdinand ta cumpli 53 aña di edad. Como tal awe den henter Reino Hulandes (Hulanda, Aruba, Corsou y St. Maarten) ta celebra Dia di Rey como un dia nacional. Ta celebra e fecha riba 26 di april den caso cu e fecha cay riba un diadomingo. Esaki ta di 7 aña cu Rey W-A ta encabesa Reino Hulandes, despues cu su mama, Prinses Beatrix, a abdica di su trono na aña 2013. Pero debi na e crisis di Coronavirus, e aña aki no tin ningun celebracion publico.
A cuminsa cu e celebracion di Dia di Rey desde 31 di augustus 1885. E tempo ey a yam’e Prinsessedag pa celebra e di 5 hacimento di aña di Prinses Wilhelmina. E tabata e siguiente pa asumi e trono Hulandes. Ora el a asumi trono na November 1890 a cambia e nomber pa Koninginnedag. Na September 1948, e yiu di Reina Wilhelmina, esta Prinses Juliana, a asumi trono y como tal a cambia e fecha pa su hacimento di aña, esta 30 di april.
Aunke cu e yiu muhe di Reina Juliana, esta Prinses Beatrix a asumi trono na aña 1980, toch el a opta pa mantene e celebracion na honor di su mama, aunke cu e mes ta haci aña dia 31 di januari.
Na aña 2013 Reina Beatrix a abdica di trono y su yiu mayo, Willem-Alexander, a asumi e funcion di Rey. El a bira e prome Rey desde cu ta observa e celebracion aki di Dia di Reina-Rey. Como tal desde 2014 e celebracion a cambia di celebra Aña di La Reina pa Dia di Rey y a cambia e fecha di 30 pa 27 di april, cu ta e fecha cu nos Rey ta haci aña.
Normalmente e celebracion ta sosode rond di henter Hulanda y riba e islanan Hulandes den Caribe. E color oraño ta resalta. Su Mahestad Rey Willem-Alexander, Su Mahestad Reina Maxima y Su Altesa Real, Prinses van Oranje, Prinses Alexia y Prinses Ariane ta celebra Dia di Rey awe na cas, na Paleis Huis ten Bosch. Pa 10:00am (ora di Hulanda) SM Rey Willem-Alexander lo tira un discurso cortico y pa 4:00pm lo cera e celebracion cu brindando durante un brindis nacional, pero online via e website www.koningsdagthuis.nl
