Casi tur biahero rond mundo cu yega New York mester bay den cuarentena pa dos siman. Gobernador Andrew Cuomo a firma dialuna ultimo un ordo ehecutivo como recordatorio na tur biahero cu ta drenta New York di paisnan nivel dos y tres tin di bay den cuarentena. Tambe mester yena e formulario NYS Department of Health pa biaheronan. Tur esey ta pa preveni cu COVID-19 sigui plama, door cu paisnan rond mundo ta experenciando e di dos ola. Aruba ta un di e paisnan cu ta riba e lista di nivel tres, riesgo halto di COVID-19.
Desde maart, estado di New York a exigi un cuarentena obligatorio pa cualkier biahero cu yega New York di un pais di nivel dos of tres; pero menos trintiun pais. E anuncio di Cuomo ta un contesta directo riba e decision di CDC pa baha e medidanan di control di COVID-19 den aeropuertonan. “E decision di CDC pa pone stop, inspeccion, y mehoracion na aeropuertonan, hunto cu e alarmante casonan di aumento di paisnan rond mundo, ta presenta cada bes un menasa grandi p’e progreso di New York den e guera contra COVID-19,” el a bisa.
CDC ta sigui aumenta nan medida di control den aeropuertonan cu ta acepta vuelonan internacional, pero e medidanan aki ta necesario pa conecta biaheronan cu Departamento di Salud pa contact tracing. E trintiun pais cu no ta riba e lista ordo ehecutivo y no ta bay den cuarentena obligatorio ta American Samoa, Anguilla, Bonaire, Brunei, Cambodia, Cayman Islands, Dominica, Falkland Islands, Fiji, Guernsey, Greenland, Grenada, Isle of Man, Laos, Macau SAR, Marshall Islands, Mauritius, Micronesia, Montserrat, New Caledonia, New Zealand, Palau, Saba, Saint Barthelemy, Saint Kitts and Nevis, Saint Lucia, Saint Pierre and Miquelon, Sint Eustatius, Taiwan, Thailand y Timor-Leste.
