Inclusion financiero ta e ambicion pa haci servicionan financiero accesibel pa tur individuonan y companianan.
Como tal, e ta un parti integral di e desaroyo economico di Aruba y ta forma e base di bienestar financiero di nos comunidad. Durante di e periodo di 19 di november te cu 17 di december 2018, Banco Central di Aruba (BCA) lo tene e encuesta relaciona cu inclusion financiero.
E meta di e encuesta aki ta pa BCA adkiri informacion valioso tocante e nivel di acceso na y uzo di productonan y servicionan financiero door di individualnan. E data obteni lo yuda BCA determina su maneho pa fomenta inclusion financiero na Aruba.
Pa yuda BCA colecta e datonan importante aki, un grupo selecta di encuestador lo bishita diferente hogar na Aruba y haci esaki na nomber di BCA. E personanan aki lo haya un carnet cu e logo di BCA pa identifica nan mes. Nan tin e obligacion pa tene tur informacion cu nan ricibi confidencial.
BCA ta consciente cu un parti di e informacion aki por ta sensitivo y pesey ta enfatisa cu e encuesta aki ta completamente anonimo. Tambe BCA ta garantisa cu tur informacion obteni lo wordo trata confidencialmente y uza solamente pa metanan estadistico y pa mehoracion di maneho di BCA.
BCA ta spera cu comunidad lo coopera cu e encuesta importante aki. Si tin cualkier pregunta ariba e topico aki, por tuma contacto libremente cu Sra. Elmelynn Croes, Economista na BCA y alabes lider di e proyecto aki, na tel. 5252230 of via e-mail: [email protected].
