Transishon
Manera ta konosí pronto nos hospital nobo ta keda kla pa asina brinda nos komunidat e servisio deseá i di un forma mas modernisá.
Tambe ta konosí pa mi persona di informashon ku mi ta dispone di dje ta ku tur personal di Sehos lo pasa pa Curaçao Medical Center ku otro palabra niun hende lo no pèrdè nan trabou.
Solisitut
Grandi tabata mi sorpresa ora ku mi a tuma nota ku personal nan di Sehos mester solisitá pa por bai traha na HNO siendo ku na mi pareser esei no tabata e palabrashon. Esaki sigur a trese un preokupashon i hopi strès pa e personal nan di Sehos. último siman nan tabatin e proseso di solisitut ku a tuma lugá di kual hopi personal ta konfundí i falta di informashon pa loke ta trata e funshonnan nobo ku lo tin den Curaçao Medical Center. Fuera di esei tin sierto funshonnan ku aktualmente tin den Sehos lo no ta eksistí mas i tambe tin sierto funshon ku e kantidat na Curaçao Medical Center ta hopi ménos kompará ku loke tin na Sehos aktualmente. Esaki ta algun di e situashonnan ku a presentá i ku ta tresiendo hopi konfushon serka personal di Sehos.
Vakatura Eksterno
Pa loke ta trata e parti aki pa mi mes personal e ta algu inkomprendibel. Tin vakatura ku a keda habri pa por solisitá na Curaçao Medical Center siendo ku ni esnan ku ta laborando ei nan no tin klaridat riba na funshon. Mi a tuma nota tambe di un invitashon ku Curaçao Medical Center a saka na Hulanda pa asina tur esnan ku ta interesá pa traha na Curaçao Medical Center por asistí na evento ku lo tuma lugá 23 novèmber 2018 na WTC den Haag kaminda e direktor sr G Martina lo tei pa duna presentashon.
Den kuadro di esaki Sr Plet a hasi Minister di Salubridat Públiko, Medio Ambiente i Naturalesa e siguiente preguntanan:
- Kiko ta e motibu ku awor a resultá ku personal nan di sehos mester solisitá pa por bai traha na Curacao Medical Center siendo ku a palabra ku tur hende lo pasa over?
- Kiko ta sosodé ku e personanan ku no solisitá?
- Kiko ta sosodé ku e personanan ku lo solisitá pero ku no a logra haña e funshon?
- Kiko ta e motibu ku a saka vakatura na Hulanda i no na Kòrsou i/òf tur dos pareu?
- Kon por ta ku ta habri vakatura siendo ku e personal di Sehos no tin klaridat riba kua funshon nan lo bai haña?
6. Kiko ta meta di e Meet up event Curacao Medical Center na Hulanda?
