Comerciantenan Uni Aruba (CUA) ta di acuerdo cu conseho di CAFT y decision di gobierno pa bin un impuesto na frontera. Esaki ta un decision cu gremio comercial a propone na Gabinete Wever-Croes di prome cu dicidi pa aumenta BBO. Fuera di cu ta bay trece un competencia mas husto entre comercio formal y informal, tambe lo aumenta cumplimento y genera un entrada grandi pa caha di gobierno. Unico cu CUA ta lamenta, segun su president, Frans Ponson, ta cu gobierno no a tuma e decision aki prome, ya cu e lo por a reduci e aumento di BBO.
Mientras cu un compania legal ta declara y paga su BBO tur dia 15 di luna, tin un cantidad substancial di persona for di basta tempo ta cumpra cos afo, bende nan riba Facebook y no ta duna gobierno su parti di esaki. Door di aplica un impuesto di importacion, ta haci e procedura igual y husto pa tur hende.
Ponson: “E ta bay trece hopi placa den caha di gobierno. P’esey a bisa gobierno implementa esaki prome, wak kico ta e diferencia cu mester y e ora ey ta bay wak cuanto ta hisa BBO. Por ta na luga di 7%, por a bay 6.5%. Pero gobierno a opta pa lant’e na 7 prome.” E splicacion di parti di diferente comerciante di pakico e lo ta en realidad 7.5% y no 7% por wak den e forum di e website di CUA.
Pa e relato completo, lesa edicion di TREMPAN
