Banda di e surplus cu AZV a logra den 2023, tabatin otro logronan cu e organisacion ta sinti su mes orguyoso di nan. E director, ir. Edwin Jacobs, a recorda cu no solamente a logra elimina e 5.5% di recorte entrante prome di mei pero tambe a haci algun inversion cu ta beneficia e clientenan di AZV.
E 5.5% tabatin un balor di 14 miyon florin. Y a crea espacio pa inverti 13 miyon florin den diferente otro proyecto den cuido. Asina por ehempel Hospital a ricibi un suma pa upgrade nan mashin di MRI.Esaki tabata necesario pa cumpli cu standardnan internacional. Tambe a inverti den patalogia digital. E situacion actual ta cu ta saca un muestra y ta mand’e Hulanda (via KLM) pa haci analisis di dje. Awo a inverti pa crea un sistema mas lih’e. Ta saca un potret y manda digitalmente Hulanda. Di e forma aki ta haya e resultado mas lihe, y cuminsa cu tratamento mas trempan.
E dos inversionnan ey ta hopi necesario ya cu Aruba a cay atras den e sistema cu ta uza. Programa di deteccion di cancer trempan na boca di matriz y na tripa ta beneficia di e inversionnan aki. Hustamente door di e programanan aki a mira un caida den incidencia di cancer di tripa bou di pashentnan di 50+, y aumento bou di millenials.
Segun Jacobs, e sector a bati alarma cerca nan. Aña pasa a cuminsa inverti caba den diferente infrastructura necesario prome cu yega na e programanan aki. E inversionnan den e programa lo cuminsa den 2024 cu ayudo di Stichting BOB. Un parti di e infrastructura mester ta na hospital.
Den 2023 a duna mey miyon pa deteccion di boca di matriz y tripa, a inverti den un camber extra pa endoscopia. Hospital tambe a haya 700 mil florin extra pa baha e lista di espera, tambe pa dialisis y otro cosnan chikito. “En total hospital a haya rond di 5.3 miyon florin pa proyectonan na beneficio di cuido.”
IMSAN
Tambe AZV a hinca mas inversion den Instituto Medico San Nicolas (ImSan). Asina nan a cumpra dos ambulance heavy. Esaki ta pa personanan cu peso excesivo. Esun cu nan ta uzando ta uno di 25 aña bieu cu a yega di haya regalo for di Coastal.
Jacobs a splica cu mirando e demanda cu tin p’e tipo di ambulancenan aki ta grandi, a dicidi di cumpra dos unidad. Tambe a haya placa tambe pa dos ambulance chikito cu no a yega Aruba ainda.
Na ImSan tambe tin un lista di espera pa loke ta operacion di catarata. Den esaki tambe AZV a percura pa ImSan haya un miyon florin pa cumpra extra lens. Aworaki nan ta realisando 80 operacion pa luna, pero tin e capacidad pa yega te na 160 operacion pa luna. A percura aña pa 1 miyon florin pa mas o menos 400 lens. Y e aña’ki lo percura atrobe pa tin suficiente y di e forma aki reduci e lista di espera.
A haci compra di mas stoel pa e pashentnan di dialisis, mientras cu e renoba tur e stoelnan bieu. Stichting BOB a haya 1.8 miyon pa bini cu un programa di computer pa e administracion di e fundacion y un mammograaf nobo.
Respaldo a haya un miyon florin tambe pa reduci e lista di espera mientras cu dokternan di cas a haya un suma pa educacion di e asistentenan. Pues en totall a inverti 13.4 miyon florin adicional den e presupuesto di 2023.
