Tin por lo menos un miembro di Association of Aruban Realtors (AAR) cu ta disgusta di e forma con directiva a tuma decision sin consulta cu e miembronan.
Segun Riecardi Irausquin di Team ID Real Estate a conta cu e AAR tin alrededor di 150 miembro. No obstante e cantidad di miembro, t’e directiva kende ta consisti di algun persona t’esunnan cu ta tuma e decision sin duna espacio pa participacion of votacion di e miembronan. E ta disgusta, mirando cu cada agente ta paga 500 florin pa aña pa ta miembro pero di otro banda no ta haya un sosten di AAR.
Henter e disgusto y malcontento ta bay rondo di e echo cu AAR a acorda hunto Aruba Fair Trade Authority (AFTA) pa bin cu cambio den e percentahe cu e real estate agent por gana na momento di sea compra of benta di un propiedad. E cos a bay asina leu cu hasta ta evaluando pa bula afo for di AAR si no mira cambio. Dado caso hasta ta pensando di lanta un otro organisacion di real estate na Aruba.
Tabata prome di januari ultimo cu AFTA a cuminsa cu un control mas severo riba real estate na Aruba. Na maart ultimo AAR a informa su miembronan cu e parti di comision ya no ta regula mas. Compara cu antes, tabatin un acuerdo cu e real estate agent ta cobra y of gana 5% di e suma total di sea e benta of compra, esaki ya no ta e caso mas. Awo e bendedo por scoge cu ken e kier traha y na e porciento cu e kier. Pa algun, ta hacie dificil mirando cu ya tabatin contrato di benta of compra acorda caba.
Cu e cambio aki, awo e clientenan kier kibra y of renegocia e contrato. Pa e agente cu ta asesora e proceso, ta bira mas dificil, mirando cu for di nan mes ta inverti den e parti di e mercadeo y tin ora hasta inversion pa haci e propiedad mas atractivo pa pon’e riba mercado.
