Por ripara cu eleccion ta cerca pasobra ya caba e politiconan a cuminsa sali den media cu diferente tipo di promesa. Un promesa of declaracion recien cu a bini for di AVP ta cu lo aumenta pension cu 50% manera cu drenta gobernacion. Esaki ta algo cu, segun Presidente di Organisacion di Pensionado Publico di Aruba (OPPA), Ivo Valdes ta hopi bon, pero ta spera cu ta factibel.
“Si bo puntra mi esaki, mi lo bisa, hopi great si nos por hay’e. Sigur pa e hendenan cu tin solamente un pension. Con e partido politico cu ta propaganda esey ta bay hacie, ami no lo drenta e tema ey pasobra e lo bira un tema politico,” segun Valdes.
OPPA no tin ningun intencion pa ‘lastra garoshi’ pa ningun partido politico. Cu e pensionadonan kier un aumento den pension ta sigur pasobra costo di bida ta haltisimo na Aruba. “Man habri nos lo tum’e. Mi ta spera e por bira realidad, y cu ta factibel si.”
No ta asina cu tin un aumento den entrada pa despues di un tempo bolbe bisa cu tin di bay corta atrobe. “Mi no sa si e trahadonan ta dispuesto pa paga un prima mas halto pa aumenta e fondo di pension ey, pero esey no ta mi problema, ya mi ta pensionado, dus e ta bay bira un tema politico cu mi ta spera nan por trat’e trankilamente y cu berdad e por bira realidad.”
