Diadomingo mainta trafico a stagna barbaramente den area di rotonde Ponton na momento cu un truck a hay’e den un incidente durante su transporte y a causa un desaster cu azeta riba e caminda principal.
Esaki a sosode den careda di 10:00AM ora cu e tabata acercando e rotonde y mester a tuma un birada skerpi na man drechi. Pa un motibo of otro e maniobra no a bay bon y e grua cu tabata parti patras a bolter. A consecuencia di esaki, azeta a basha den gran cantidad riba caminda.
Polis a presenta mesora y asina desvia e trafico pa evita cu vehiculo riba e ruta aki por hayanan confronta cu accidente innecesario pa via di e azeta riba caminda. Obviamente e azeta riba caminda lo a nifica cu hopi auto lo por a slip y como tal a cera e caminda pa evita cualkier desgracia.
Tin di menciona cu te den oranan di atardi ainda departamentonan concerni tabata na sitio trahando pa cu haci e rotonde limpi.
