Gerencia di Canal 90 FM a dicidi awe pa cancela e programa “Pueblo na Palabra” debi na mal comportacion di oyentenan. Un señora lo a yama y na final lansa un ofensa contra un otro oyente, tur esaki den aire. No ta prome biaha cu algo asina ta sosode, pa cual a dicidi awe pa para e programa pa tempo indefini.
Pa algun tempo caba e stacion di radio, e di dos na Aruba y e prome riba frequencia modula, FM, ta pasando dor di varios cambio drastico di imagen, programacion y di presentadonan. E generacion mas hoben di famia Arends, nietonan di defunto Albertico Arends a tuma e maneho over.
Ta obvio cu kier rehubenece e emisora y prepar’e pa e siguiente nivel di desaroyo, avancenan tecnologico y programacion digital moderno. Den esey tipo di programanan asina, cu e mesun grupo chikito di oyente ta yama tur dia pa opina, varios biaha atacando otro, no ta pas mas pa e temponan aki.
A realisa cambio den orario, a move orario di noticia mainta y pueblo na palabra merdia, pero toch a keda cu e reto di oyentenan politicamente motiva cu ta cla para pa ataca otro via radio. Advertencianan publico pa mehora comportacion den aire no semper a yuda. Di otro banda, Directie Tekecommunicatie Zaken ta semper cla para pa manda advertencia por escrito pa e tipo di fayonan asina, cu menasa pa “trek in” e permiso di transmicion di e emisora.
