Diamars 1 di September y Diaranson 2 di September 2020 for di 7’or pa 10’or anochi, California Lighthouse lo ta habri un biaha mas parti anochi. Esaki ta specialmente debi cu tin luna yen. E ultimo edicion na comienso di July a resulta como un exito grandi y awor den September lo tin e oportunidad atrobe pa subi anochi.
California Lighthouse lo ta habri pa por subi te na e top pa por disfruta e bista unico di Aruba “by night”, debi na e luna yen, tin un bista hopi bunita di iluminacion di e luna riba lama, pero tambe riba tera. Entrada lo ta solamente 10 florin pa residente. Sigur esaki ta un bista sumamente bunita tanto pa famia, grupo di amigo of parehanan romantico. E ‘Full Moon’ di e luna aki ta hiba e number di ‘Corn Moon’. No perde e oportunidad aki. Pa mas informacion por jama 6990995.
