Awe ta dia internacional di marihuana, 4/20. E ta un dia special p’e usuarionan di cannabis, caminda ta para un rato keto pa recorda nan dia. E celebracion di 4/20 a cuminsa na aña 1971 door di cinco studiante di California. Ta uza e terminologia 4/20 den conexion pa e orario, esta 4:20 pm pa huma e marihuana. E hobennan di e tempo ey esta, Steve Capper, Dave Reddix, Jeffrey Noel, Larry Schwartz y Mark Gravich a hasta diseña un statua di 4/20 na San Rafael High School na California. E grupo di cinco tabata yama nan mes “The Waldos” p’e simpel motibo cu nan tabata “chill” contra muraya (wall) y huma marihuana. El a cuminsa como un “inside joke” y awendia ta un celebracion grandi mundialmente. Na Merca tin binticuater estado cu por bo por uza marihuana libremente, pues ta legal. Mientras cu na Hulanda ta normal pa pasa un coffeeshop y dal un bate di marihuana.
Na Aruba
Tin por lo menos un politico cu a bay eleccion y priminti e pueblo cu e lo legalisa marihuana, esta lider di Partido ReD, mr. Ricardo Croes. Esey tabata na aña 2017, t’e mesun Croes na 2013 a ricibi exactamente 420 voto riba su nomber. Na 2017 Croes a subi te 3359, pa cual tabata e di tres votegetter di pais Aruba e tempo ey. Claro, despues cu e no a cumpli cu su promesa di legalisa marihuana recreacional despues di forma gobierno cu MEP y POR, na 2021 pueblo a castig’e y el a cay te 1184 voto y tin tur indicacion cu e lo cay mas aun den proximo eleccion parlamentario. Segun Croes, ta MEP a manc’e y p’esey no a logra “legalisa co”.
Di otro banda, MEP, por lo menos Dangui Oduber ta di opinion cu el haci di su banda pero a ricibi contratiempo cu banconan local pa por bay asina leu. A logra di por lo menos legalis’e medicinal; pero no reacreacional. Ricardo Croes ta di opinion cu despues cu a hacie legal pa medicinal, t’e propio compinchi nan di MEP a ricibi permiso pa importa y bende
CBD oil. Awendia, ReD ta cayendo atras den popularidad despues cu MEP a mata no solamente nan pero tambe POR. Expertonan riba nivel politico, ta mirando mesun wega cu a haci cu ReD y POR, ta haciendo cu RAIZ actualmente.
