Awe mainta 9:00am ta programa pa start cu tratamento di Presupuesto 2019 den reunionnan publico den Parlamento di Aruba. Ey e 21 Parlamentarionan lo mester aproba of desaproba e presupuesto/maneho di Gabinete Wever-Croes pa otro aña. Normalmente ta entrega e presupuesto rond di 1 di september y ta trat’e y keda cla cune prome cu cambio di aña. Mayoria Gobierno di ultimo aña, incluyendo AVP y MEP casi nunca a logra cumpli cu esaki.
Awe mainta 9:00am lo start cu tratamento di e presupuesto nobo di Interim Begrotingsfonds Sociaal Crisisplan Aruba. Su tras mesora lo sigui e presupuesto di Ministerio di Asuntonan Social y di Labor. Parlamento ta spera di cuminsa cu tratamento awe y keda cla cu ambos presupuesto awe mes tambe.
Mayan diaranson ta start atrobe pa 9:00am cu presupuesto di Ministerio di Desaroyo teritorial, Infrastructura y Medio Ambiente. Ta sigui diahuebs e ora cu presupuesto di Ministerio di Turismo, Salubridad Publico y Deporte. Diabierna mainta lo habri cu tratamento di presupuesto di Ministerio di Husticia, Siguridad y Integracion.
Lo tuma liber den fin di siman pa habri dialuna mainta atrobe cu tratamento di e presupuesto di Ministerio di Enseñansa, Ciencia y Desaroyo Sostenibel. E mesun dia kier keda cla tambe cu e presupuesto di Ministerio di Transporte, Comunicacion y Sector Primario. Diamars lo sigui cu tratamento di presupuesto di Ministerio di Finansa, Asuntonan Economico y Cultura. Y riba diaranson, 19 di december, kier finalisa cu tratamento di presupuesto di Ministerio di Asunto General, Integridad, Maneho Aparato Gubernamental, Innovacion y Energia.
Parlamento a acorda cu cada Parlamentario lo haya 20 minuut pa hiba palabra durante prome rond pa cada Ministerio. Den di dos rond nan tin 10 minuut pa hiba palabra y haci preguntanan na cada Minister.
E agenda riba su mes ta hopi ambicioso, teniendo cuenta cu experiencia di otro añanan. Si 20 miembro di Parlamento hiba palabra den prome rond, ya ta casi 7 ora caba di discurso so. Ainda mester conta e discurso di e Minister encuestion cu lo mester contesta tur pregunta cu a lans’e. Ministernan no tin limite di tempo pa hiba palabra. Den di dos rond e Parlamentarionan tin 10 minuut cada un, pues si 20 haci uzo di nan tempo ta mas di 3 ora atrobe di discurso. Ta pronostica cu e reunionnan aki lo start di mainta y caba te den oranan laat di anochi/marduga.
