Awe nochi lo dicidi “Ken lo dirigi Carnaval 66”

6093

Tin tres candidato cu a postula nan mes pa e puesto di Presidente di Stichting Maneho Aruba su Carnaval (SMAC), cu ta e organisacion encarga pa organisa carnaval 66 riba nos isla. E fundacion ta existi pa 5 aña caba y lo apunta su di tres Presidente awe nochi durante un reunion di Directiva na nan sede pa 6:30pm. E ganado, scogi entre e 11 miembronan di Directiva, lo encabesa e organisacion den cuadro di organisacion di Carnaval pa aña 2020.

E candidatonan ta Zuleika Wever, cu ta un miembro independiente pa e ultimo 3 añanan den e Raad van Toezicht di SMAC. E di dos ta Jason Brown, un otro miembro independiente pa e ultimo 3 añanan. E di tres miembro interesa ta Darren van Ommeren, den representacion di e Gruponan Uni, cu awor ta drenta e fundacion.

Zuleika Wever ta un docente pa hopi aña caba y ta conoci pa algun aña pa ta masha activo den SMAC.

E particion di miembronan den directiva di SMAC ta encera 4 miembronan procedente di Gruponan Uni, pues di e gruponan cu ta participa activamente den paradanan di carnaval. Tin 4 miembro di Fundacion MUSICA y tambe 3 miembro independiente entre e 8 miembronan cu ta bini entre e dos organisacionnan di gruponan y bandanan di carnaval.

Jason Brown ta un Taxista y tambe a haci hopi aporte, den forma boluntario, durante su tempo liber, pa desaroyo di nos carnaval via SMAC.

Pa awor, SMAC ta para na un crusada importante den nan existencia. Nan tin 5 aña caba encarga cu organisacion di carnaval riba nos isla y a haci diferente cambio caba den e forma di organisa, e premionan, e fechanan, ruta y hopi mas. Tin di e cambionan a bay facil, y otronan a conta cu resistencia. E prome Presidente di SMAC tabata Randy Thiel y di dos tabata Shannon Henriquez. Awor ta momento pa nombra e di tres Presidente, cu lo mester tuma timon di e fundacion y sigui traha pa desaroyo, crecemento y mehoracion di nos carnaval.

Darren van Ommeren pa e ultimo añanan a dirigi varios grupo di carnaval y ta organisa eventonan musical regularmente, pues tin un experiencia amplio den organisa eventonan, tambe grandi.

E caranan di e miembronan postula no ta desconoci den comunidad. Tur tres tin experiencia caba cu carnaval na Aruba of cu SMAC pa e ultimo añanan. Ta conoci cu tur tres ta traha pa e mesun meta, esta pa halsa nos carnaval na un nivel mucho mas halto cu locual nos conoce te awor. Ta bon pa enfatisa cu tur tres lo ta miembro di e directiva, sea cual sea e resultado di awe nochi. Darren van Ommeren ta e unico nobo drentando SMAC awo. Entre nan tres lo scoge un di nan pa sinta na cabes di mesa, pa bati e martiu pa reunion cuminsa, pa dirigi e reunion, pa kibra impasse ora tin y pa finalisa e reunionnan di SMAC.