Awetardi ta tuma luga apertura oficial di Chelo’s Sports Bar riba e caminda grandi di Ponton. E establecimiento ta situa unda antes tabata Ponton Sports Bar, pero awor ta bou maneho nobo di e conocido bartender Marcel “Chelo” Croes. E ultimo aki a rediseña e concepto completo di e luga, incluyendo un bar bon surti pero tambe cu un cushina local y Peruano.
Ayera a tuma luga e soft opening di e establecimento nobo, cu sin duda lo bira popular pa su “Green Sangria” y “Blue Sangria”, banda di e lomito burger, sopi, etc. Marcel Croes a bisa cu como cu e ta casa cu un Peruana, e lo percura pa “Leche de Tigre” y “Ceviche” cu lo bin estilo snacks den un glas di Martini.
Tur diabierna lo tin prijs special riba Happy Hour riba premium brand. Nan lo ta habri di 5:00pm pa 12:30am di diamars pa diadomingo. Den fin di siman lo tin e banda Robert riba Wiel pa entretene e publico presente. Pronto nan lo habri for di merdia, ora e keda cla cu e cushina.
