Tabata bou Gabinete Eman den añanan 90 cu Minister Glenbert Croes, e tempo ey, a adkiri un radar pa Departamento di Aviacion Civil. Un inversion di 11 miyon dollar Mericano, ekivalente na 20 miyon florin, pa un radar marca Westinghouse. Awe Aeropuerto a desmantela e radar completo pa por uza e tereno como parkeerplaats. Cu desmantelacion di e radar, ta pone un fin tambe na un era di un mal inversion haci, cu Gobiernonan nunca a uza, pues e radar a keda draai su so sin uzo y sin entrada!
Tabata mas o menos aña 1995 cu a adkiri e radar. E berdad ta cu a haci e inversion aki sin envolvimiento di e Departamento mes y expertonan envolvi. Consecuentemente a cumpra un radar bieu, cu no tabatin ni piesa mes pa reemplasa si algo kibra. Mester a bay na FAA pa check riba nan rekinan di productonan bieu, cada biaha, pa mira si por yega na “spare parts”.
Di otro banda, e empleadonan di Departamento di Aviacion Civil tampoco a coopera den e proceso. Nan a bay mesa bek cu nan Director y cu Departamento di Recurso Humano di Gobierno (DPO) pa cambia nan funcion di “Luchtverkeersleider” pa “Radar Luchtverkeersleider” y cu e debido adaptacion di nan posicion huridico combina cu beneficio den nan salario. Nunca a logra yega na un acuerdo y como tal nunca a traha riba e radar tampoco.
Como tal, na inicio e radar tabata traha debidamente y e empleadonan a yega te na training di con pa traha cune. Pero como cu a bin e combinacion di falta di ekipo y falta di regla posicion huridico di e trahadonan y sin lubida, e debido influencia politico di e Gobiernonan cu a sigui despues, a haci cu nunca e radar a bira operacional y nunca a cobra pa su servicionan.
Cu tempo, modernisacion y digitalisacion hunto cu miho uzo di imagennan y data di satelite a pone cu radar a bira obsoleto. ANSA, cu ta e departamento nobo cu ta atende cu pilotonan di avion y ta suministra informacion, ta uzando un sistema ultramoderno y cu no ta rekeri radar tampoco.
Mirando cu Aruba Airport Authority ta den pleno ampliacion di nan facilidad, den cuadro di e proyecto “Beatrix 2030”, a pidi Gobierno mas espacio. Un di nan ta esun unda e radar ta situa. Como cu nunca a uz’e, ANSA no tabatin obhecion pa Aeropuerto desmantel’e riba nan propio gastonan. Gobierno a traspasa e tereno pa AAA NV y asina awor lo uza e espacio como parkeerplaats.
