AVP: Fraccion di MEP den nomber di gobierno a sinta gaña trahadonan di triple A

416

Promesa falso pero deurwaarde ya a bati na porta

Durante di conferencia di prensa di fraccion di AVP, e lider di fraccion Marlon Sneek a mustra cu ta di lamenta ora cu tuma nota c’un set di Parlamentario di MEP, ta bay sinta hunto cu trahadonan di AAA den club Caiquetio y ta priminti e trahadonan aki, pa nan keda trankil.

Un grupo di trahado tur preocupa cu nan ta bay perde nan trabou, a wordo bisa pa e grupo di parlamentarionan aki di partido geel, cu nan ta bay para tur cos y cu manera cu siman habri, nan lo manda carta pa Minister encarga cu triple A, segun sr Sneek.

“No solamente nan lo manda carta pa e Minister encarga pero tambe pa Hunta di Supervision pa para tur cos y e berdad cu por wordo mira awe ta cu awor ta deurwaarde ta bay e trahdonan nan cas, bati riba porta y entrega carta na e trahadonan, bisando nan cu nan dianan ta conta.

Pa fraccion di AVP esaki ta algo di lamenta profundamente ya cu nos a bin mas di seis luna pasa, alertando riba e situacion sumamente dificil y fastioso pa e trahadonan aki.

Fraccion di AVP a pidi un reunion publico mas di dos luna pasa pa Minister Dangui Oduber bin parlamento y bin conta pueblo den Parlamento, pa motibo cu eyden e no por gaña, pasobra nos a scuche na tur radio, nos a mire na tur television, bisando cu no ta berdad, cu gobierno ta bay para cos, cu no tin ningun acuerdo,

Hasta Minister Oduber a declara cu gobierno no ta di acuerdo cu pa kita hende pero shonnan, esaki ta mentira tras di mentira y esaki ta algo di lamenta ya cu nos ta kere cu e Minister tin cu para den su sapato y si ta esey ta e caminda cu gobierno ta bay cana, bisa e trahadonan cu esaki ta e caminda cu e ta bay cana pa tal y tal motibo.

Pero no bin gaña e trahadonan, creando pa nan un speransa falso anto ora cu e ta na cas riba un diasabra, riba un diadomingo, riba un dia trankil, e trahadonan aki ta scucha batimento na porta y ora cu nan dal porta habri, ta deurwaarde a bin trece un carta den cual nan ta wordo informa cu e posicion cu nan tin, no ta existi mas.

Si e trahado kier e por bay solicita, pues nada di cambia di funcion pero bay solicita di nobo pa un otro funcion anto si e trahado haya esaki, e lo keda cu triple A ainda y si e no haya esaki, e trahado lo ta riba caya.

Pa colmo di los colmos, e carta ta papia di un funcion cu ta mas abou cu e funcion cu e trahado tabata ocupando caba, pues si e tabata un supervisor, e trahado ta wordo informa cu vacatura di supervisor no ta disponibel mas anto e trahado por bira un agent of security ya cu e posicion di supervisor security no tin mas y cu e trahado por bay solicita si e kier.

Cu otro palabra un trabou cu e trahado tabata eherce pa mas di 15 of 20 aña,  caminda e persona aki a traha duro pa yega na e posicion ey, awor ta bisa e trahado aki cu e tin cu baha un trapi bek, e salario nobo ta bay bira e salario di security pero no di supervisor mas caminda e trahado lo bay atras entre 1000 pa 1500 florin pa luna.

Si e trahado kier e ta acepta esaki y si no kier e no ta acepta e funcion nobo cu el a wordo ofreci pa triple A y esey ta su asunto personal.

Pa fraccion di AVP e cos aki ta condenabel ya cu no por ta asina cu compania ta ‘choose and pick’ ya cu mi ta kere cu mester duna e trahado un espacio den e picture total y aki tin cu puntra di con tur trahado no ta haya e chronograma nobo di e compania.

Manera por ehempel, un hende cu ta traha den security lo por tin tur abilidad pa schuif bay den un otro departamento caminda kisas den su departamento actual no ta bay tin supervisor mas pero den un otro departamento lo por tin e mesun funcion aki habri, pues e por solicita pa bay un otro departamento.

Pero aki simplemente ta bira corta e trahado, ta bise cu si e kier e ta solicita di nobo, compania no por garantisa e trahado cu ta su persona sigur lo haya un trabou nobo, caminda e trabou ta cay mas abou cu loke e trahado tin actualmente, pues salario tambe lo wordo corta.

Pa mustra e nivel di abuso den e tipo di maneho aki, e trahadonan tin te cu fin di luna aki, esta te cu proximo fin di siman, pa nan dicidi kico nan kier haci.

Si nan no bay di acuerdo compania lo inicia e proceso pa manda e trahadonan aki cas  y e tipo di cosnan aki ta condenabel, mas ainda nora cu nos tuma nota cu tin trahado malo na cas, wardando pa bay opera, ta haya bishita di deurwaarde na cas bisando nan, tende’ki bo a perde e funcion cu bo tin cual no ta existi mas y si bo kier bo ta solicita di nobo pa un otro funcion pero corda cu esaki ta un funcion mas abou cu loke bo tabatin y corda cu e salario ta bay baha.

No hende malo ta wordo respeta y esaki ta e gobierno di MEP cu a bin ta bisa cu nan tin e ser humano central, caminda den e situacion dificil cu e pais ta pasando aden, ta bula cabes di trahadonan manera gestapo, bula cabes manera nada., lagando deurwaarde hiba un carta te na e trahadonan nan cas, bisando cu te aki nos a yega cu boso.

Lo mas tristo y ainda mas condenabel ta ora cu e aspecto politico kier bay hunga un rol, gaña yama un reunion cu tur trahado, sinta cu nan pa duna speransa falso y cu gobierno no ta bay kita ningun hende pero e deurwaarde ya caba a haci su trabou como un burdugo,” Parlamentario marlon Sneek a declara.

Marlon Sneek, lider di Fraccion AVP