Nos isla ta den un problema hopi serio. Esnan cu a yega den boto gara riba Bubi Island y tambe otronan gara den mondi cu a yega dos dia prome a haya libertad y por cana los y traha si nan kier pendiente un contesta riba peticion pa Asilo.
Nos tabata tin un situacion caminda hendenan ilegal cu a yega cu avion a pidi Asilo despues cu nan a drenta Aruba caba y a keda ilegal. Despues nan a siña e les y a cuminsa pidi na frontera ora baha di avion.
Asina nan yena e documento pa peticion di Asilo nan ta haya e libertad pa cana rond y hasta traha pendiente e contesta riba nan screening. Por bisa cu casi ningun a haya un si pa Asilo. Awor cu frontera ta cera nos a haya nos mes cu un fenomeno nobo.
A resulta cu e grupo cu a drenta cu boto recientemente a ser gara riba Bubi Island. Nan no a yega tera firme. A resulta cu nan a ser hiba na Kustwacht. Den e caso asina ta interoganan. Tin cu a admiti cu mas hende a bin den e boto. Tin cu kizas no sa landa y a keda riba e isla y Kustwacht a detenenan.
Tin algun mas cu a drenta cu otro boto y a garanan den mondi. Nan a yega dos dia prome. Ora cu e grupo a yega na Guarda Nos Costa, ta manera un hende a instruinan kico pa haci. Tur a pidi formulario di peticion pa Asilo. Mas tristo ta cu ora nan a yega na Hues Comisario, esaki a laga tur liber.
A duna nan libertad inmediato a base di derechonan humano. Nan tur awor a haya libertad. Fuentenan ta bisa cu ta 14 hende a laga bay liber. Nan tin solamente meldplicht y cu derecho pa traha pendiente e contesta. A busca algun informacion y a tende cu tin departamentonan di gobierno trahando duro den weekend pa proceso tur peticion pa Asilo.
Dimes si e ta un no, mester busca manera pa sacanan. E tristo ta cu esnan cu yega ilegal cu boto no tin adres. Si nan no meld nan mes tur dia ta con lo busca nan drechi ora e contesta “No” drenta? Ademas e hendenan aki nos no conocenan. Nan por ta un peliger pa nos sociedad. Den e caso aki ta momento pa gobierno lanta for di soño y cuminsa haci algo urgente. Parlamento tambe mester move. Cu e decision di Hues Comisario nifica cu cos lo bira un free for all di pazuid pasobra tur boto lo cuminsa drenta.
Awor ya caba esnan cu a haya libertad a manda e mensahe pazuid. Cu otro palabra autoridad por warda e boto di Kustwacht, Avion, Kustsurveillance cu Polis y Douane pasobra nos ta perdiendo guerra na man di e ilegalnan cu awor tin ley pa protehanan drenta ilegal cu boto y hues comisario ta laga tur bay liber. Si leynan cu tratado internacional ta e causa, anto ta ora pa gobierno y parlamento lanta for di soño y urgente.
E siman aki e fiesta ta cuminsa y hopi pisa cu e decision di hues comisario cu a laga e hendenan bay bou capa di nan peticion pa Asilo. Na luga cu Minister di Husticia ta druk cu un contrato dudoso di Helicopter, e por a haci mas esfuerso pa pone un stop na entrada di ilegalnan cu awor Hues Comisario ta laga den libertad imediato.
