Por a tuma nota cu mondhygienest Mirto Tromp mas cu un biaha ta ricibi stagiairenan pa pasa cierto experiencia, mirando cu su añanan di experiencia.
E tin su praktijk dilanti di Hospital na Eagle. E ta conta cu e tin na Aruba, e tin 22 aña trahando como mondhygienist. E mes a studia na Hulanda na ACTA. E opleiding eynan e ta dunando servicio pa 20 aña caba, unda cu e studiantenan di Amsterdam ta bin Aruba. Nan ta bin pa 1 luna y mey, esey ta pa e 3de jaars. Esunnan di 4de jaar, ta bin pa 3 luna.
Esaki dr. Tromp ta haci’e cu hopi placer y dedicacion. Locual cu Hulanda kier mira, ta un diferencia entre Hulanda y Aruba y/of paisnan rond di Hulanda. E diferencia ta pa mira con nan ta traha como mondhygienist. Apesar cu a studia na Hulanda eynan ta splica tambe e stagiaire, por mira un diferencia toch.
Cierto cosnan full bo no por uza na Aruba. E motibo ta cu awendia tur cos ta uza placa. Bo tin cu purba di yega mas cerca posibel di e meta y yega na algo hopi bon pa loke ta e pashent. Tambe tin cu tene cuenta cu e gastonan, mirando cu e salarionan ta minimo ainda. Tin cu tene cuenta cu hopi biaha hendenan no ta yega na e chens pa por paga esaki. Tin cu haci’e na un manera hopi atractivo, pero cu e calidad halto.
Den e practica ya pa 20 aña caba, Tromp ta stage begeleider pa tanto Amsterdam, Nijmegen y Utrecht. E aña aki e tin tres stagiaire for di Amsterdam. Ora cu nan yega nan ta wak Tromp pa un siman prome, con e mes ta traha. Despues di un siman nan ta cuminsa eherce e trabao riba nan mes. Door di hinca nan den “wilde zee”, nan por siña hopi mas. E diferencia na Hulanda, e studiantenan ta haya riba zaal na e universidad, dos pa tres ora pa un pashent. Nan ta traha riba nan gusto, pa nan por haya un cifra.
Pero ora cu nan bay stage, ta un diferencia grandisimo, cu hopi biaha Tromp ta siña nan, pa saca e scol un rato for di nan cabes y adapta den e practica. Si bo bay traha dos pa tres ora riba un pashent y bo ta loop uit automaticamente bo ta perde hende.
Den practica e ta draai diferente, locual cu nan ta bay siña tambe, traha cu tempo. Tempo, pero riba un calidad halto y pa e stagiairenan ta un reto masha grandi mes.
Contacto cu universidad
Tur pashent cu e stagiairenan ta atende, Tromp tin cu stempel y firma y ta papia tur dia tambe riba con cos a bay durante dia, kico por bay miho. E feedback pa nan ta importante. Na final di e stage, nan ta haya un cifra. Y e cifra ey nan tin cu bay cun’e Hulanda y present’e dilanti e studiante y docentenan. A base di esey nan ta bay traha un caso di kico nan a maak mee cu un pashent, prome y despues. Esey nan ta bay splica miho na scol y pa haya un cifra tambe pa esey.
Presente
E prome simannan Tromp ta coach e stagiairenan directamente. E ultimo simannan, e ta hala un tiki un banda, scondiendo den cushina. E intension ta pa nan traha independiente. Ora cu nan keda pega un caminda, e ora Tromp por cay aden di biaha pa nan. Pero e intension ta cu e delaster simannan, Tromp kier mira e independencia. Esey nan tin cu haya, un confiansa den nan mes. Una bes cu nan tin esey, nan por sigui. No mester lubida cu ta muchanan di 3de jaars. Y despues ta sigui 4de jaars. Ora nan caba despues di un aña, nan tin cu traha cu tempo, e ora con e dentista lo tumabo of con bo ta bay produci tambe. Tur eseynan ta cosnan cu nan ta siña na e praktijk.
Ora cu Tromp ta mira e boca di e pashent den un control, hopi biaha ta trece preguntanan teoretico tambe, wak si nan sa cierto materianan. E combinacion eynan entre lo teoretico y practica, ta un combinacion hopi bon, caminda cu ta bisa cu ya caba e studiante ta bezig ta orienta su mes, cu e ta haci algo, pero dicon e ta haci’e y con ta pas’e aan cu e teoria.
