Modesto Croes, conoci pa hopi como Mo Junior, a fayece awe mainta den su soño na Hospital. E tabatin algun siman interna den Hospital, incluyendo den e unidad di cuido intensivo, cu complicacionnan di salud debi na Covid-19. Entretanto el a cura di e virus, a sali di ICU pero su curpa a keda debil. Awe mainta ora a bay lant’e for di soño a nota cu e no tabata duna señal di bida mas y a constata cu el a fayece.
Modesto Croes ta naci dia 19 di september 1948, pues a caba di cumpli 72 aña di edad. Pa colmo el a cumpli aña siendo interna den ICU, sin cu ningun hende por a bishit’e. Tabatin un rato cu su señora tambe a contagia cu Coronavirus, pues nan tur cos tabata interna pareu. Entretanto e casa si a recupera completo y por a bay cas, mientras cu Mo Junior si a keda lucha cu su salud.
Modesto Croes ta un pi’i morocho di Asucena Croes, su ruman muhe cu a fayece siendo baby. Nan ta yam’e Junior pasobra el a haya e mesun nomber cu su tata, esta Modesto, pa cual a yam’e Modesto Junior. E ta casa cu Fransisca Croes-Thijzen y for di e matrimonio a nace e yiunan Reinbert Croes y Risselle Croes. Nan nietonan ta: Kimberly y Reindeline Croes. E hasta tin un bisanieta.
Na tur Mo Junior Croes a traha 39 aña largo, cu ta inclui e tempo cu el a sirbi servicio militar y despues a studia pa polis na Scol pa Polis na Corsou. El a baha finalmente cu pensioen dia 19 di september 2008, ora el a cumpli 60 aña di edad. Hopi hende ta cord’e trahando e ultimo añanan na ward’i polis di San Nicolas, como wachtdommandant. Den su carera policial e tabata Inspecteur pero tambe a fungi como Bario Regisseur pa algun tempo.
Na su famia, ex-coleganan y conocinan, ta bay palabranan di profundo condolencia. Hopi forsa den e momentonan dificil aki. Cu Mo Junior sosega na paz.
