E noticia di e aumento di airport tax ta algo cu Gerencia di Aruba Airport Authority NV y Minister di Turismo a bin ta deliberando pa un tempo caba. Durante e evento di ATCA e siman aki, aumento di airport tax tabata un topico cu a wordo discuti basta den gang y den encuentronan oficial. Pa algun tempo caba ta papiando riba e financiamento di expansion di aeropuerto Internacional Reino Beatrix den cuadro di e proyecto Gateway 2030. Diferente sugerencia a wordo haci na e Minister encarga y esun cu mas e pensamento a bay riba dje ta aumento di airport tax, mirando e cantidad di turistanan cu ta bishita Aruba.
E idea ta pa aumenta esaki cu 20 florin. E entrada cu ricibi extra aki ta bay specialmente pa cubri un parti di e gastonan relaciona cu e proyecto Reina Beatrix. NACO a gana e contract di diseño pa expansion di Aeropuerto Internacional Reina Beatrix yama “Gateway 2030”. Den esaki mester haci un inversion di 200 miyon dollar pa di e forma aki acomoda e fluho creciente di pasahero, brinda un miho servicio y yega na e metanan di sostenibilidad.
E proyecto aki ta permiti pa ofrece servicio di pre-clearance Mericano tambe. E parti mas importante di e proyecto di reconstruccion lo ta e facilidadnan expandi di check-in, e sistema nobo di maleta y mehoracion di e proceso di control di siguridad pa un sistema segun e standardnan di EDS-TSA pa pasaheronan cu ta biaha pa Merca.
E sistema nobo di maleta lo inclui tambe un sistema di clasifica cu lo percura cu aeropuerto lo por haci check-in di vuelonan cu no ta bay Merca tambe den e mesun facilidad. Asina eficiencia lo mehora uzo di e capacidad na aeropuerto. Cu e facilidadnan nobo aki pasaheronan lo experiencia filanan menos largo y tempo mas cortico pa check-in, asina mehorando e nivel di servicio brinda durante oranan druk, a wordo bisa durante e presentacion di e proyecto. E diseño ta inclui un sistema automatico di e edificio pa coriente y airco, cu ta uno hopi moderno.
Tur cos ta di un forma special construi cu e sistema mes ta detecta cuanto airco mester manda basa riba e ocupacion. E ta encera dos porta di avion mas y dos terminal adicional di bus pa e pasaheronan por yega mas lihe na nan avion y lo amplia e area comercial brindando un variacion mas grandi di servicio.
