Mayoria grupo di carnaval ta den ful preparacion pa Carnaval 70. Den fin di siman tra’i lomba diferente grupo tabata tin nan actividadnan.
Diasabra anochi tabata Noord/Infinity Carnival Group (ICG) tabata tin nan actividad pa asina corona nan reinanan pa cu lo representa nan grupo otro aña den Carnaval 70.
Rib’e anochi aki ICG a corona tanto nan reina hubenil como nan señora Carnaval pa 2024. Jonathan Tromp di Noord Infinity Carnival Group (ICG) a indica cu carnaval ta den porta y Noord Carnival Group ta den ful preparacion pa cu e magno evento aki.
Asina tambe Joylienne Tromp ta esun scogi pa representa Noord/Infinity Carnival Group den e eleccion di Reina Hubenil pa Carnaval 70. Esther Tromp-Tromp lo representa e grupo den eleccion di Sra. Carnaval pa Carnaval 70.
Tromp a bisa cu e preparacionnan ta den ful swing. E grupo tin varios seccion, cual generalmente ta cera. Pero si tin algun luga ainda den massa.
Carnaval 70 lo ta un di e carnavalnan mas grandi cu Aruba a yega di conoce.
SRA. CARNAVAL
Esther Tromp-Tromp lo ta representa e grupo aki den eleccion di Sra. Carnaval.Tabata un anochi bunita y yen di alegria.
E idea pa e bay competi den eleccion di Sra. Carnaval, segun Tromp, a cuminsa como un joke. Nan tabata sinta na cas di su señora mama, bou di dak ora cu su yiunan a cuminsa bis’e p’e bay pa Sra. Carnaval, despues mas famia y amistadnan tambe a cay aden, pushand’e p’e bay competi, pa cual el a dicidi di tuma e reto aki y bay p’e.
Tambe el a bisa cu na prome instante nan a prepara pa un seccion door cu nan famia ta uno grandi. Asina tambe e preparacionnan a cuminsa. El a bisa cu e preparacion pa seccion ta practicamente cla, pero pa Sra. Carnaval ta awo e ta bay cuminsa cu e preparacionnan.
El a haci un apelacion cu si tin mas persona cu lo kier join nan pa asina engrandece Aruba su Carnaval, pa inscribi y asina Aruba su carnaval lo resalta un biaha mas.
REINA HUBENIL
Diasbra anochi tambe Noord/Infinity Carnival Group a corona na representante pa Reina Hubenil di Aruba su Carnaval, den persona di Joylienne Tromp.
Joylienne tin 13 aña di edad y manera e ta bisa, e ta hopi contento di por ta e Reina Hubenil di Noord/ICG. E ta un hoben cu ta bin for di un famia cu ta gusta carnaval. Y su idea ta pa bay participa den Carnaval pa asina engrandece un parti di nos cultura.
E ta invita pueblo di Noord y Aruba en general pa bin apoy’e otro aña durante eleccion di Reina Hubenil y tambe pa yuda nan den nan fundraising.
SMAC
Presente n’e evento aki tabata t’ey tambe Presidente di Stichting Maneho di Aruba su Carnaval (SMAC), Darren van Ommeren.
Van Ommeren a indica di ta sumamente contento cu e gruponan ta cuminsa di trempan, ya cu trempan ta benta. Si tur grupo cuminsa trempan, Aruba lo tin un carnaval hopi grandi.
Noord Infinity Carnival Group a presenta na Reina Hubenil y Sra. Carnaval 2024
Pa SMAC ta importante pa e gruponan cuminsa for di trempan. E actividadnan cu ta tene durante aña ta pa recauda tambe pa e gruponan. Tambe ta importante pa e gruponan tene iniciativa durante aña pa nan por recauda fondo tambe pa nan grupo.
ELECCION
Tur cos ta mustra cu eleccionnan di reina ta bay ta grandi pa otro aña. Van Ommeren a bisa cu aki dos siman lo tin un reunion tocante e regla- y criterianan di eleccion di reina, pa pasa riba nan, pa wak si tin algun cambio. pero cualkier cambio lo ta minimal.
Ta spera cu e eleccionnan di reina pa otro aña lo ta uno grandi. Tur cos ta mustra cu eleccion no lo conta cu dos of tres candidata, pero sigur lo tin mucho mas candidata ariba stage.
Ya e fechanan ta poni caba, pa mita di januari 2024.
Mirando e cantidad di participantenan pa e eleccion di reina hubenil, grandi y sra. Carnaval, ta premira cu cada eleccion lo ta riba un dia, enbes di ta manera awo di infantil y hubenil hunto y reina grandi cu Sra. Carnaval tambe riba un solo dia.
Te na e momentonan aki lo tin 12 pa 13 grupo lo ta presente den Carnaval 70, compara cu e 6 gruponan cu tabata presente durante Carnaval 69.
Un apelacion cu presidente di SMAC tin pa e gruponan ta pa prepara trempan, Carnaval 70 ta un gran celebracion. Den SMAC su ultimo presentacion cu e gruponan, a ifnorma di e cambionan pa Carnaval 70.
Pa Reina di Carnval lo no tin finalista, pero e di dos finalista lo ta Reina di Carnaval 68, prome finalista Reina di Carnaval 69 y e ganado lo ta Reina di Carnaval 70. Di e manera aki tambe nan lo ‘trek recht’ e añanan y pa Carnaval 71, e lo cuminsa cana bon bek.
