Mientras cu Aruba ta sigui mehora e experiencia di bishitantenan for di momento cu nan yega, e Food Truck Plaza na Aeropuerto Internacional Reina Beatrix a bira un showcase unico di cultura, sabornan y e hospitalidad di nos isla. Situa strategicamente mes banda di e sala di yegada, e plasa ta ofrece bishitantenan un prome sabor di Aruba por medio di cuminda local, musica y e calor humano di nos comunidad.
Den e entrevista aki, Jonny Andersen, CEO di Aruba Airport Authority (AAA), ta comparti e vision tras di e Food Truck Plaza, ta splica pakico e aeropuerto a wordo scogi como e locacion ideal, y con e concepto a bira un punto di encuentro acogedor tanto pa bishitantenan como pa habitantenan di Aruba.
Primeramente, e idea ta pa crea un sentido di pertenencia,” asina Johnny Anderson, CEO di Aruba Airport Authority (AAA), a afirma tocante e inspiracion tras di e Food Truck Plaza na aeropuerto. Segun Anderson, e concepto a wordo crea pa duna bishitantenan un introduccion autentico di Aruba for di e momento cu nan yega.
“Ora bo yega na un luga, bo ke compronde unda bo ta y kico e luga ey ta representa. Ora bishitantenan yega na Aruba, nan pasa door di aeropuerto, sali for di sala di yegada y mesora nan ta mira e Food Truck Plaza. Aki nan ta haya cuminda local, musica local y hende local. Ta manera un Aruba chikito den un espacio hopi compacto.”
E plasa no ta popular solamente entre turistanan. Anderson ta splica cu habitantenan local tambe ta wordo invita pa bishita y disfruta di e experiencia. “Nos ta invita e localnan tambe pa bini. De hecho, e ta hopi popular entre e personanan cu ta traha na aeropuerto. Nos tin mas o menos 1.500 persona cu ta traha na of conecta cu aeropuerto y hopi di nan ta uza e area aki regularmente. Tambe nos ta mira hende di diferente parti di Aruba bini bishita e luga.”
El a enfatisa cu e idea tras di e Food Truck Plaza ta p’e fungi como un punto di encuentro pa tur hende: E biaheronan, empleadonan di aeropuerto y residentenan di Aruba. Na final, Anderson a haci un invitacion tanto na turistanan como na localnan: “Nos lo desea pa e bishitantenan pasa pa conoce e cuatro food trucknan local, purba nos cuminda tipico y disfruta di e ambiente. Pero tambe nos ta anima e localnan pa bini prome cu nan biaha, of simplemente pasa pa un lunch of un descanso cortico. E Food Truck Plaza ta aki pa tur hende disfruta.”
Barbara Brown, Chief Revenue Development and Communications Officer, a splica cu e idea tras di e Food Truck a cuminsa algun aña pasa ora cu nan tabata kier a desaroya algo, pa no solamente e hendenan cu ta bin airport pa traha, pero tambe esunnan cu ta bin trece e hende of ta bin busca e hende. Y mas cu claro, e comunidad en general di Aruba. Asina nan a bisa pa crea un experiencia dilanti di aeropuerto unda cu e hendenan por sinta, relaha, come y bebe algo.
Di e manera ey tambe, en bes di habri un otro restaurant of kiosco, pakico no bin c’un truck di cuminda? E trucknan di cuminda ta algo cu e hendenan, ora cu nan yega Aruba, tur hende ta wak, ora nan core rond di nos isla. P’esey nan a dicidi di busca cuater operador di truck di cuminda, pa wak si e ta traha. Y a logra: E ta un exito grandi. Trucknan di cuminda tabata t’ey caba pa un par di tempo.
Tin hopi hende di e comunidad di aeropuerto cu ta busca nan cuminda n’e truck, pero tambe hendenan cu ta bin aeropuerto pa busca nan cuminda. Nan tin e oportunidad di sinta y bebe algo mientras cu nan ta warda riba nan cuminda. E turistanan y comunidad di Aruba, tur ta bonbini pa bin disfruta di e trucknan di cuminda. Nan ta habri for di 7:30am te atardi of anochi, dependiendo di e vuelonan.
Un di e doñonan di truck di cuminda na aeropuerto ta John Gutierrez, doño di El Tio Snack Bar y famia tambe di La Tia Rosa Snack. El a indica cu un di e beneficionan di tin un truck di cuminda na aeropuerto ta e exposure cu nan ta haya n’e comunidad di aeropuerto, cu ta haci uzo di nan facilidad, pero tambe e turistanan cu ta yega, nan por purba un tiki di e cuminda internacional.
Por ultimo, Gutierrez a indica cu nan bishitantenan ta mas tanto turistanan cu a caba di yega, cu, mientras nan ta wardando riba nan auto di huur, ta ofrece nan, pa nan purba un poco di tur loke tin di ofrece.
Cu su mescla unico di sabor local, musica y hospitalidad Arubiano, e Food Truck Plaza ta ofrece un experiencia autentico cu ta conecta e bishitante- y localnan cu e esencia di Aruba for di e prome momento.
