Rementa Celebro ta un proyecto cu Aruba Tourism Authority ta bini cu ne pa celebracion di Aruba su Dia di Himno y Bandera. E ta un programa cu ta pasa en bibo riba 18 di maart na Telearuba.
E concepto di e Quiz ta uno ameno y dibertido cu por participa den dje via di cas riba e plataforma digital. Esaki e directora di Aruba Tourism Authority, Ronella Tjin Asjoe, a splica cu di e forma aki kier sigui conscientisa e pueblo di su cultura y e importancia di esaki pa turismo. E conocemento cu mester tin pa duna na e bishitantenan di Aruba.
Den cuadro di e pensamento menciona, ATA a dicidi di uni su mes na e programa di celebracion 18 di maart.
Aña pasa a organisa diferente evento virtual cu a demostra cu esaki ta un sistema ideal pa yega na hopi hende y esaki ta loke kier a haci na Aruba pa pueblo durante celebracion di Aruba su Dia Nacional. “E ta importante pa bini cu algo cu ta inculca conocemento pero den un forma dibertido y sigur. Pensando riba concepto a dicidi lansa uno innovativo y dibertido cu comunidad henter por ta participe,” directora di ATA a splica.
Henter Aruba por participa den e Quiz, cu ta encera hopi mas cu e 25 preguntanan cu tin. Por subi riba e pagina di Facebook di Ban Serio Aruba, cu ta duna informacion con pa prepara pa e evento di 18 di maart. For di momento cu subi Facebook ta cuminsa cu un interaccion cu su punto culminante lo ta ora e Quiz cuminsa pa 7’or di anochi y lo tin un duracion di un ora y mey.
E anfitrionnan pa e anochi aki ta Larissa Bermudez y Ruben “Scorpio” Garcia. E lo ta un anochi no solamente pa hari, pero pa siña mas di e cultura di Aruba.
Pa participa, directora di ATA Ronella Tjin Asjoe a bisa mester registra riba e cuenta Ban Serio Aruba riba Facebook.